ظلم دا بدلہ

نہ ای چُپ چَپیتے بیٹھے
نہ ہونٹھاں تے جندرے لائے
نہ ای مَنگیاں ڈھیر دعاواں
سارے کَٹھے ہوکے آئے
سبھ نے رَل کے جَھنڈا چُکیا
کوجھے تے بے شکلاں دا
نویں دور نے فرق مکایا
رنگاں دا تے نسلاں دا۔۔۔۔۔۔۔۔۔۔۔۔۔۔!

٭٭٭٭٭

*دھرتی*

گُھمدی اے یاں نَچدی اے

ٹُردی اے یاں نَسدی اے

اُجڑی اے یاں وَسدی اے

روندی اے یاں ہَسدی اے

دن چڑھے تے سورج نال

کنیاں ای گلاں کردی اے

راتیں پوے تے چانن نوں

دل دیاں گلاں دسدی اے

لوکی دُشمن دھرتی دے

دھرتی سجن سبھ دی اے

دھرتی سجن سبھ دی اے

٭٭٭٭٭