پٹرولیم دی قیمت وچ ڈھیر گھاٹا ہوون دے باوجود  مہنگائی کیوں نہیں گھٹ ہو رہی:وزیراعظم عمران خان  نے نوٹس لے لیا۔۔۔٭رویل نیوز٭

اسلام آباد(نمایندا رویل) وزیراعظم عمران خان نے پٹرولیم مصنوعات وچ کمی دے باوجود مہنگائی گھٹ نہ ہون دا نوٹس لے لیا۔ وزیراعظم آفس ولوں مشیر خزانا‘ چاراں چیف سیکرٹریز نُوں خط لکھیا گیا اے جہدے وچ وزیراعظم عمران خان نے کھاون پیون شیواں دیاں قیمتاں وچ کمی تے قومی قیمت کنٹرول کمیٹی نُوں ہفتا وار شیواں دیاں قیمتاں نُوں مانیٹرکرن دی ہدایت کر دِتی جد کہ وفاقی کابینا نُوں قیمتاں وچ کمی لیان لئی طریقا کار وضح کرن دی ہدایت کر دِتی۔ وزیراعظم عمران خان نے کہیا اے کہ پٹرولیم مصنوعات وچ وڈے پیمانے اُتے کمی دے باوجود کھاون پیون شیواں دیاں قیمتاں ودھ رہیاں نیں‘ آٹے دی قیمت ودھان دی کوئی منطق نہیں بندی‘ وزیراعظم نے صوبیاں دے وزرائے اعلا تے چیف سیکرٹریز نُوں معاملا ویکھن دی ہدایت کر دِتی جد کہ صوبائی حکومتاں کھاون پیون شیواں دیاں قیمتاں وچ کمی نُوں یقینی بنان‘ وزیراعظم نے کہیا کہ روزانا دی بنیاد اُتے شیواں دیاں قیمتاں دا جایزا لیا جاوے‘ لوکائی نُوں پٹرولیم مصنوعات دیاں قیمتاں وچ کمی دا فایدا ہر صورت پہنچایا جاوے۔وزیراعظم آفس نے چٹھی چاراں چیف سیکرٹریز تے مشیرِ خزانا نُوں گھل دِتی اے۔ایس توں وکھ وزیراعظم دی صدارت ہیٹھ ملک وچ کرونا وایرس دی صورتحال اُتے اجلاس ہویا جہدے وچ لاک ڈاؤن سخت کرن دے آپشن اُتے غور کیتا گیا۔ وسیلیاں دے مطابق اجلاس وچ فیصلا کیتا گیا اے کہ پہلے مرحلے وچ لوکائی نُوں کرونا توں بچن لئی ضابطا اخلاق اُتے عمل کروان دی تلقین کیتی جاوے گی‘ چاراں صوبیاں تے ازاد کشمیر گلگت بلتستان دی سیاسی قیادت لوکائی نُوں ایس او پیز اُتے عملدرآمد دی تلقین کرے گی۔ وسیلیاں دے مطابق سیاسی قیادت راہیں لوکائی نُوں ایس او پیز اُتے عملدرآمد دی تلقین کیتی جاوے گی‘ ایس او پیز اُتے عملدرآمد نہ کیتا گیا تے لاک ڈاؤن سخت کیتا جاوے گا۔ ایس توں وکھ وزیر اعلا پنجاب سردار عثمان بزدار نے صوبے وچ آٹے‘ کھنڈ‘ گھیو‘ پولٹری سنے لوڑی دیاں شیواں دیاں قیمتاں وچ استحکام لئی ہر ممکن انتظامی اقدامات چُکن دا حکم دِتا اے۔ وزیر اعلا عثمان بزدار نے وزیر اعلا آفس وچ منعقدا اعلا سطح دے اجلاس نال خطاب کردیاں ہویاں کہیا کہ کسے نُوں آٹے‘ کھنڈ‘ گھیو‘ پولٹری تے ہور لوڑی دیاں شیواں دیاں قیمتاں نہیں ودھان دواں گے‘ ناجایز منافع خوراں دے خلاف انتظامی طور اُتے ایکشن ہووے گا‘ لوکائی نُوں متھے بھاء اُتے لوڑی دیاں شیواں دی فراہمی ہر صورت یقینی بنائی جاوے گی۔ اوہناں نے کہیا کہ کرونا وباء دے دوران وی منافع دے ناں اُتے لوکائی نُوں لُٹن والیاں نُوں خدا دا خوف نہیں‘ پہلے وی لوکائی دے حقاں دا تحفظ کیتا تے ہُن وی ایہناں دے مفادات دی نگہبانی کراں گے‘ لوکائی دے مفادات نُوں زک پہنچان والے ہر کارٹل نُوں توڑیا جاوے گا۔