اَج نیب نے انصاف دیاں دھجیاں اُڈا دِتیاں نیں ایہ سبھ عمران نیازی گٹھ جوڑ اے: شہباز شریف  دی میڈیا نال گلبات۔۔۔٭رویل نیوز٭

لاہور (نمایندا رویل) لاہور ہائیکورٹ نے مسلم لیگ لیگ (ن) دے صدر تے قومی اسمبلی وچ اپوزیشن لیڈر شہباز شریف دی آمدن توں ودھ اثاثا جات کیس وچ عبوری ضمانت منظور کر لئی‘ عدالت نے نیب نُوں 17 جون تک گرفتاری توں روک دِتا اے۔ جسٹس طارق عباسی تے جسٹس فاروق نے شہباز شریف دی درخاست اُتے سنوائی کیتی اے۔ شہباز شریف ولوں اعظم تارڑ تے امجد پرویز ایڈووکیٹ نے دلایل دِتے۔ نیب ولوں سپیشل پراسیکیوٹر نیب سید فیصل رضا بخاری وی لاہور ہائیکورٹ وچ پیش ہوئے۔ عدالت نے پُچھیا ا کہ کیہ شہباز شریف نُوں گرفتاری دا دھڑکو اے؟ وکیل درخاست گزار نے معزز جج نُوں دَسیا کہ نیب اوہناں دے مؤکل نُوں گرفتار کرن لئی بے تاب اے۔ نیب نے جہڑا ریکارڈ منگیا دے دِتا فیر وی گرفتاری لئی بے تاب اے۔ شہباز شریف نُوں 5 اکتوبر 2018 نُوں صاف پانی کیس وچ سَدیا گیا تے ریمانڈ دوران شہباز شریف نُوں رمضان شوگر مل کیس وچ گرفتار کیتا گیا۔ نیب دی ٹیم 63 دن دے ریمانڈ وچ تفتیش کردی رہی پر فیر وی کجھ نہ مِلیا۔ معزز جج نے نیب پراسیکیوٹر نُوں روسٹرم اُتے بُلا کے پُچھیا کہ کیہ نیب شہباز شریف دی درخاست ضمانت دی مخالفت کردا اے؟ نیب دے وکیل سیف فیصل رضا بخاری نے عدالت نُوں اگاہ کیتا نیب شہباز شریف دی ضمانت دی مخالفت کردا اے اوہناں دی درخاست ضمانت رَد کیتی جاوے۔ لاہور ہائیکورٹ نے دلایل سنن دے بعد شہباز شریف دی ضمانت 5 لکھ رُپئے دے مچلکیاں دے بدلے منظور کر لئی تے نیب نُوں ہدایت کیتی کہ قومی اسمبلی و چ قائد حزب ختلاف شہباز شریف نُوں 17 جون 2020 تک گرفتار نہ کیتا جاوے۔ ایس توں بعد عدالت دے باہر میڈیا نال گلبات کردیاں ہویاں اپوزیشن لیڈر نے کہیا کہ ریلیف دین اُتے عدالت دا شکر گزار آں‘ اج نیب نے انصاف دیاں دھجیاں اُڈا دِتیاں نیں ایہ سبھ عمران نیازی گٹھ جوڑ اے جہڑا قوم دے ساہمنے آ گیا اے۔