ہتھ سُٹ

ہتھ سُٹ

پہلے کرپٹ تے چور جہے ساڈا لہو چوسدے سی

منافع خوراں تے سرمایا داراں دا راج سی

ٹھیکیدار اپنی مَن مرضی کردے سی

ہر پاسے انصاف دا کال سی

بڑا بُرا حال سی

بے ایمان ساڈیاں اَکھاں چ مِٹی سُٹدے سی

شیطان دے چیلے کَدی کَدی ورغلاندے سی

تاہیوں پُٹھے پُٹھے خیال آندے سی

ہُن ویکھ لو

لہو چوسن دے نال نال ہڈیاں وی چَٹ رئے نیں

نہیں یقین تے اکھاں بند کرو

جلون محسوس ہووے گی

ٹھیکیداریاں تے یاریاں عروج تے نیں

انصاف۔۔۔۔۔۔۔۔۔!

یتیم بچیاں کولوں پُچھ لو

ہُن ساڈیاں اکھاں وِچ ریت سُٹی جا رئی اے

بڑی رَڑک پیندی اے یار

شیطان دے چیلے ہر ویلے نال ای ہُندے نیں

پُٹھے خیال نہیں آندے

ہُن پُٹھا کرن نوں جی کردا اے

ڈُب کے تَرن نوں جی کر دا اے۔۔۔۔۔۔۔۔۔۔!

٭٭٭٭٭