پہلا  گلوبل پاکستان ٹیک سمٹ دا مُڈھ،  ٹیکنالوجی دے ودھا لئی ہر جتن کراں گے،ارزش اعظم  پاکستانی نوجواناں لیئ اک مثال نیں: وفاقی وزیر شبلی فراز

اسلام آباد (رویل نیوز)انفارمیشن ٹیکنالوجی دا ودھا ساڈی حکومت دی پہلے کرن والے کماں وچوں اک اے. ایہ گل وفاقی وزیر برائے اطلاعات و نشریات سینیٹر شبلی فراز نے ایجاد لیب دی چھتر چھاویں پہلا ہون والے گلوبل پاکستان ٹیک سمٹ دی شروعات کردیاں ہویاں اپنی آن لائن تقریر وچ آکھی. اوہناں ایہ وی آکھیا پئی ایس حکومت نوں اہنے انفارمیشن ٹیکنالوجی دے شعبے وچ موجود اپنے جواناں دی قابلیت دا چنگی طرحاں پتا اےتے سانوں یقین ایں کہ اوہ دنیا بھر وچ ملک دا ناں اُچا کرن گے اوہناں آکھیا پئی ایجاد لیب دے بانی ارزش اعظم پاکستانی نوجواناں لیئ اک مثال نیں تے اسی ایہناں نال رل کے کئی منصوبیاں تے کم کرن دا اراداکیتا ہویا اے. گلوبل پاکستان ٹیک سمٹ دے آرگنائزر ارَش اعظم نے دسیا کہ ایہ کانفرنس پورا مہینا، 30 جون تک چلدی رہے گی تے ایہدے وچ دنیا بھر توں 100 توں ودھ اہم بندے کرونا توں بعد پاکستان نوں ڈیجیٹل پاکستان بنان تے ایہنوں نویں ڈھنگ نال ترقی دی راہ تے پاون بارے اپ ے وچار سانجھے کرن گے. اوہناں دسیا کہ ایس کانفرنس وچ چیف انفارمیشن آفیسر ایسٹونیا سم سیکوت، چیف ٹیکنالوجی آفیسر سیاٹل امریکہ سعد بشیر، بنک آف امریکہ دے نائب صدر ڈاکٹر عامر علی، اخوت پاکستان دے چئیرمین ڈاکٹر امجد ثاقب، سینیٹر میاں عتیق شیخ، فیصل سبزواری تے ضیاء اللہ بنگش، سید قاسم علی شاہ تے قیصر عباس سمیت بہت سارے ہور پروہنے وی رلت کرن گے. اوہناں ایہ وی دسیا پئی. ایہ جگت کانفرنس ویلے دی لوڑ سی تے ایہ ایشیا بھر وچ ہون والی پہلی کانفرنس اے.