معافی دا ویلا مُک گیا:سمارٹ لاک ڈاؤن تے عمل نہ کرن والیاں خلاف کارروائی، مارکیٹاں بند،دُکاندار گرفتار،۔۔۔٭رویل نیوز٭

اسلام آباد‘لاہور (نمایندا رویل)حکومت نے سمارٹ لاک ڈاؤن اُتے عملدرآمد نہ کرن والیاں خلاف ایکشن دا اغاز کر دِتا‘ کئی مارکیٹاں سیل‘ بہت سارے دُکانداراں گرفتار‘ وفاقی دارلحکومت وچ ایس او پیز دی خلاف ورزی اُتے 115 بندیاں نُوں جرمانے‘ 83 دکاناں سیل‘ گلگت بلتستان‘ خیبر پختونخوا وچ وی کارروائیاں کیتیاں گئیاں۔ تفصیلات مطابق پورے ملک وچ ایس او پیز اُتے عملدرآمد نہ کرن والیاں وڈیاں مارکیٹاں بند کرن دا فیصلا کر لیا گیا۔ترجمان نیشنل کمانڈ اپریشن سنٹر دے مطابق این سی او سی دی اِک ٹیم پورے ملک دے دورے کر گی تاں جے سمارٹ لاک ڈاؤ ن دیاں خلا ف ورزیاں دا جایزا لین دے نال نال مقامی انتظامیا دی مدد وی کیتی جا سکے تے کرونا وایرس دی روک تھام لئی اوہناں دیاں لوڑاں وی پوریاں کیتیاں جا سکن۔ وزیراعظم دے وکل پرسن برائے کرونا وایرس ڈاکٹر فیصل سلطان ایس ٹیم دی اگوائی کرن گے۔ پنجاب تے خیبر پختونخوا دیاں وڈیاں مارکیٹاں بند کرن لئی اپریشن شروع کر دِتا گیا۔ چیف سیکرٹری پنجاب نے این سی او سی وچ بریفنگ دیندیاں ہویاں کہیا کہ غیر ذمے داری مَوت دا کارن بن رہی اے۔ ایس او پیز اُتے عملدرآمد نال ای کرونا دے کھلار نُوں روکیا جا سکدا اے۔ پنجاب دیاں وڈیاں مارکیٹاں این سی او سی دے فیصلیاں دے تناظر وچ بند کیتیاں جان گیاں‘ انڈسٹریل ایریاز‘ مارکیٹاں تے ٹرانسپورٹ نُوں پابند بنایا جاوے گا‘ خلاف ورزی دی صورت وچ جرمانے عاید کیتے جان گے۔ اودھر چیف سیکرٹری پنجاب جواد رفیق ملک دی صدارت ہیٹھ کیمپ آفس وچ ہنگامی اجلاس ہویا جہدے وچ کرونا وایرس دی روک تھام بارے ایس او پیز اُتے سختی نال عملدرآمد کروان دا فیصلا کیتا گیا۔ اوہناں نے انتظامیا تے پولیس نُوں احکامات جاری کردیاں ہویاں کہیا کہ ہُن معافی دا ویلا ختم ہو گیا‘ سبھ افسران فیلڈ وچ نکلن۔ چی سیکرٹری پنجاب نے حکم دِتا کہ ایس او پیز دی خلاف ورزی دیاں مرتکب دکاناں تے بازاراں نُوں فوری بند کر دِتا جاوے‘ ماسک دی پابندی دی خلاف ورزی کرن والیاں خلاف سخت کارروائی کیتی جاوے‘ احتیاطی تدبیراں اُتے عملدرآمد یقینی بنان لئی انتظامی تے پولیس افسران آپ فیلڈ وچ موجود رہن۔ دوجے پاسے شہباز گل نے سماجی رابطے دی ویب سائٹ اُتے ٹویٹ کردیاں ہویاں کہیا کہ ایس او پیز اُتے عملدرآمد نہ کرن اُتے پورے ملک وچ کئی وڈیاں مارکیٹاں اج بند کر دِتیاں جان گیاں‘ پنجاب تے کے پی کے وچ وی اپریشن شروع کر دِتا گیا اے‘ سانوں ساریاں نُوں ہر صورت ایس او پیز اُتے عملدرآمد کرنا پوے گا۔