نواز شریف دا ناں ای سی ایل وچوں کڈھن دی درخاست اُتے وفاقی حکومت نوں نوٹس کیوں ملیا؟

لاہور(نمائندا رویل)پاکستان مسلم لیگ (ن) نے اج سابق وزیر اعظم نواز شریف دا ناں بغیر کسے شرط دے ای سی ایل وچوں کڈھن دی درخاست لاہور ہائی کورٹ وچ دایر کیتی سی۔جہنوں چھیتی ای سنوائی لئی مِتھ دتا گیا سی۔جسٹس علی باقر نجفی دی اگوائی وچ دو رکنی بنچ نے نواز شریف نوں باہرلے ملک گھلن دی درخاست اُتے سنوائی کیتی۔ لاہور ہائی کورٹ نے ایس موقعے اُتے وفاقی حکومت نوں نوٹس جاری کردے ہوئے جواب منگ لیا اے۔سنوائی دوران عدالت نے پُچھیا کہ ایہ دسو نواز شریف دا ناں کہڑے نیب بیورو دے آکھن اُتے ای سی ایل وچوں کڈھیا گیا، جہدا جواب دیندے ہوئے سرکاری وکیل نے آکھیا کہ اجے ویکھنا اے کہ ناں کہڑے نیب بیورو دے آکھن اُتے ای سی ایل وچ پایا گیا۔جہدے مگروں عدالت نے سنوائی کل تیکر لئی ملتوی کردے ہوئے حکومت کولوں جواب منگ لیا اے۔