کرونا دا کھلار روکنا،ٹڈی دل،نویں رُکھ لانا تے ماحولیاتی آلودگی تے قابو پان لئی ٹائیگر فورس توں مدد لئی جاوے گی:عمران خان۔۔۔٭رویل نیوز٭

اسلام آباد (اُچیچا نمایندا) وزیراعظم عمران خان نے ملک وچ کرونا وایرس نال پیدا ہون والے بحران لئی بنائی گئی خصوصی کووِڈ 19 ریلیف ٹائیگر فورس نُوں ٹڈی دل تے ماحولیاتی تبدیلیاں کارن شجرکاری مہم وچ شامل ہون دی ذمے داری دے دِتی۔ ٹائیگر فورس دے حوالے توں خصوصی خطاب کردیاں ہویاں وزیراعظ نے کہیا کہ دنیا وچ صرف 2 ملک سن جہناں نے ایس گل دا ادراک کیتا کہ کرونا دے کارن پیدا ہون والے بحران نال نبڑن لئی سانوں رضا کاراں دی ضرورت اے۔ اوہناں نے کہیا کہ سانوں ایہو جہے رضا کاراں دی لوڑ سی جہڑےلوکائی وچ جا کے کرونا وایرس توں بچا دے طریقیاں دے حوالے توں اگاہی دین۔ وزیراعظم نے کہیا کہ ساڈا کلا مسلمان ملک سی جہنے ایہ فیصلا کیتا کہ رمضان المبارک دوران مسیتاں کھلیاں رکھیاں جان گیاں تے ایس سلسلے وچ ایس او پیز اُتے عملدرآمد کروایا جاوے گا۔ اپنے خطاب وچ اوہناں نے دَسیا کہ مخالفین نے بہت رؤلا پایا کہ مسیتاں بندکیتیاں جان پر ساڈے مشاہدے وچ ایہ گل آئی کہ مسیتاں توں کرونا دا کھلار نہیں ہویا تے اج دنیا دے ہور ملک وی ایس او پیز اُتے عمل کر کے مسیتاں کھول رہے نیں۔ اوہناں دا کہنا سی کہ جے اسیں ہُن وی لوکائی نُوں احتیاط کروائیے تے اسیں اوس مشکل ویلے توں نہیں لنگھاں گے جہدے توں دنیا دے ہور ملک لنگھے۔ وزیراعظم نے کہیا کہ برازیل تے امریکا وچ مَوتاں دی شرح بہت اُچی اے پر ایہدے مقابلے پاکستان وچ حالت بہت بہتر اے پر فیر وی افسوس دی گل اے کہ اینیاں مَوتاں ہوئیاں۔ اوہناں نے کہیا کہ ٹائیگر فورس دے رضا کاراں نُوں لوکائی وچ شعور پیدا کرنا اے جے انج کرن وچ کامیاب ہو گئے تے کرونا دے کیسز وچ کمی آ سکدی اے۔ اوہناں دا کہنا سی کہ ایہ وایرس اے تے ایہنے کھلرنا اے اسیں لوکاں نُوں کمرے وچ بند نہیں کر سکدے کیوں جے صرف ایس صورت وچ وایرس دا کھلار شاید رُک جاوے پر ساڈے ورگے ملک لاک ڈاؤن دے متحمل نہیں ہو سکدے۔ وزیراعظم نے کہیا کہ بھارت وچ شدید غربت دے باوجود سخت لاک ڈاؤن لایا گیا جہدے نال تباہی مچ گئی تے اوتھے لوک مر رہے نیں۔ اوہناں نے دَسیا کہ اسیں احساس پروگرام دے تحت 1 کروڑ 60 لکھ خانداناں نُوں ریلیف پہنچایا اے‘ جے اسیں ایہ اقدام نہ چُکدے تے پاکستان وچ بُرا حال ہو جاندا۔ اوہناں دا کہنا سی کہ اسیں لاک ڈاؤن ول واپس نہیں جا سکدے ایہ ملک ہور لاک ڈاؤن برداشت نہیں کر سکدا۔ وزیراعظم دا کہنا سی کہ سانوں پتا سی کہ ڈاکٹراں تے طبی عملے اُتے دباء ودھے گا تے پوری دنیا وچ طبی عملا ایس دباء دا شکار اے پر جے ایس او پیز اُتے عمل کروایا گیا تے ایس دباء وچ کمی آ سکدی اے۔ اوہناں دا ہور کہنا سی کہ اسیں سمارٹ لاک ڈاؤن کیتا ایہدے باوجود ٹیکس ریونیو وچ 8 کھرب رُپئے دی کمی آئی ہُن تک اسیں پچھلیاں حکومتاں دے لئے گئے قرضیاں اُتے 5 ہزار ارب رُپئے سود دی ادائیگی کر چکے آں ایس لئی ریونیو وچ ایہ کمی ساڈے لئی اوکڑاں دا کارن بنے گی۔ وزیراعظم نے کہیا کہ اگلے مالی سال دے بجٹ وچ سانوں وڈے چیلنجز دا ساہمنا کرنا پوے گا تے اخراجات گھٹ کردیاں ہویاں آمدن دھان دے طریقیاں اُتے توجا دینی پوے گی۔ وزیراعظم نے کہیا کہ ٹائیگر فورس نُوں خصوصی کارڈز دِتے جان گے‘ ایہدا فایدا ایہ اے کہا نتظامیا نُوں تہاڈی شناخت دا پتا لگے گا تے جہڑے بندے بیروزگار ہوئے اوہناں دی معلومات تُسیں حکومت نُوں دوو گے جد کہ اسیں پہلے توں دِتی گئی معلومات اُتے کم کر رہے آں۔ اوہناں نے دَسیا کہ مینوں ہور 2 شعبیاں وچ ٹائیگر فورس دی ضرور اے جہدے وچ اِک ٹڈل دل اے جہڑا 30 سال بعد پاکستان وچ ایس طرحاں حملا آور ہویا اے کہ فصلاں تباہ ہو کے رہ گئیاں نیں‘ ایس سلسلے وچ تہانوں دَسیا جاوے گا کہ کس طرحاں تُسیں انتظامیا دی مدد کر سکدے او۔ اوہناں نے کہیا کہ ماحولیاتی تبدیلیاں دے کارن پاکستان دے گلیشئر ز پگھل رہے نیں تے دیاواں وچ پانی وی ایتھوں آندا اے جہڑا ویلے دے نال گھٹ ہوندا جاوے گا ایس سلسلے وچ اسیں شجرکاری دی مہم شروع کیتی سی جہدے وچ ہُن ٹائیگر فورس دی مدد وی لئی جاوے گی۔