وایرس نال پیدا ہوئے بحران کارن غربت تے بے روزگاری ودھے گی،وزارتِ خزانا داسینیٹ  نوں جواب ۔۔۔٭رویل نیوز٭

لاہور (نمایندا رویل) وزارتِ خزانا ولوں کہیا گیا اے کہ کرونا وایرس دے بحران دے کارن ملک وچ 30 لکھ بندے بیروزگار ہو سکدے نیں۔ وزارتِ خزانا نے سینیٹ وچ اپنا تحریری جواب جمع کروا دِتا جہدے وچ کہیا گیا اے کہ صنعتی شعبے دے 10 لکھ تے خدمتاں دے شعبے دے20 لکھ بندے بیروزگار ہو سکدے نیں۔ وزارتِ خزانا نے اپنے بیان وچ ایوان نُوں دَسیا اے کہ کرونا وایرس دے بحران کارن غربت دی شرح 24.3 فیصد توں ودھ کے 33.5 فیصد ہو جاوے گی۔ سینیٹ وچ جمع کروائے گئے بیان وچ وزارتِ خزانا نے کہیا اے کہ کرونا وایرس دے بحران کارن فروری توں مارچ رُپئے دی قدر وچ مہینا وار بنیاد اُتے 7.5 فیصد کمی آئی۔ وزارت خزانا دا کہنا اے کہ کرونا دے بحران توں پہلے جی ڈی پی گروتھ دا تخمینا 3.24 فیصد سی‘ مالی سال 2020 وچ 0.4 فیصد دی منفی شرح نمو رہی۔ اپنے تحریری جواب وچ وزارت خزانا دا کہنا اے کہ اپریل توں جون تک ایف بی آر ریونیو وچ 700 توں 900 ارب رُپئے تک کمی ہووے گی۔ وزارتِ خزانا دا سینیٹ نُوں دِتے گئے تحریری جواب وچ کہنا اے کہ ایف بی آر دا ٹیکس ریونیو 3905 بلین رُپئے تک ڈِگ سکدا اے‘ ایف بی آر دا ٹیکس حدف 4800 ارب سی۔ تحریری جواب وچ وزارت خزانا ولوں کہیا گی ااے کہ مالی کسارا7.5 فیصد توں ودھ کے 9.4 فیصد ہو جاوے گا۔ وزارت خزانا دا سینیٹ نُوں تحریری جواب وچ کہنا اے کہ پاکستان دیاں برآمدات گھٹ ہو کے 21.22 ارب ڈالرز ہو جان گیاں۔ وزارت خزانا نے کہیا اے کہ بیرونِ ملک کم کرن والے مزدوارں دی ترسیلات وچ 2 ارب ڈالرز دی کمی ہووے گی‘ کرونا وایرس دے بحران کارن بجٹ کسارا 9.4 فیصد تک ودھ جاوے گا جد کہ 2018-19 وچ وفاقی سرکاری ملازماں توں 5977 ملین ٹیکس اکٹھا کیتا گیا جد کہ آئی ایم ایف توں 1442 ملین ڈالرز ایکسٹینڈٹ فنڈ فیسیلیٹی راہیں لئے گئے۔