بجٹ توں پہلے سرکاری ملازماں نُوں ترجیح دوو: سرکاری ملازمین یونینز الائنس۔۔۔٭رویل نیوز٭

اسلام آباد (بیورو رپورٹ) مختلف سرکاری اداریاں دے یونینز آگوواں نے کہیا اے کہ اج پورے ملک دے سرکاری ملازماں دیاں یونینز اِک پلیٹ فارم اُتے اکٹھیاں نیں تے اِک الائنس کونسل فار یونائیٹڈ یونینز اینڈ ایسوسی ایشن آف گورنمنٹ ایمپلائز پاکستان بنایا اے‘ جہدے وچ سیکرٹریٹ ایمپلائز کور کمیٹی‘ آل پاکستان آڈٹ اینڈ اکاؤنٹس کمبائنڈ ایسوسی ایشن‘ آل پاکستان کلرکس ایسوسی ایشن‘ پاکستان نیشنل سیونگز ایمپلائز یونین (سی بی اے)‘ پاک پی ڈبلیو ڈی عظیم ورکرز یونین سنے ہوراں نے رلت کیتی۔ ایس موقع اُتے سیکرٹریٹ ایمپلائز کور کمیٹی دے آگو رحمان باجوا نے کہیا کہ سرکاری اداریاں وچ ملازماں نُوں شدید اوکڑاں دا ساہمنا اے‘ حکومت توں مطالبا کردے آں کہ اوہ بجٹ وچ کسے وی قسم دا وادھا کرن توں پہلے پِسے ہوئے ملازماں نُوں ترجیح دیوے جد کہ وزیراعظم دو نہیں اِک پاکستان بنان دا وعدا پورا کرن۔