جولائی اگست وچ کرونا دا کھلار ہور ودھ جائے گا،ہسپتالاں نوں سہولتاں دے رہے آں، جو احتیاط نہیں کرے گا اوہ بہت وڈا ظلم کرے گا: وزیراعظم عمران خان۔۔۔٭رویل نیوز٭

اسلام آباد (نیوز ڈیسک) وزیراعظم عمران خان نے خبردار کیتا اے کہ جولائی یاں اگست وچ ملک وچ کرونا کیسز ٹیسی اُتے ہون گے‘ جے احتیاط نہ کیتی تے بہت اوکھا ویلا آن والا اے تے ملک نُوں نقصان ہوے گا‘ لوکائی جے (ایس او پیز) اُتے عمل کرے تے کیسز تیزی نال نہیں کھلرن گے تے پاکستان اوس تباہی توں نہیں لنگھے گا جہڑی ہور ملکاں اُتے آئی اے‘ لاک ڈاؤن نال کرونا ختم نہیں ہوندا سگوں وباء کھلرن دی رفتار گھٹ ہو جاندی اے‘ اسیں کوشش کر ریہ آں کہ چالو مہینے 1000 بیڈ ز وینٹی لیٹر دے نال پورے ملک وچ پہنچا دیے‘ اسیں اِک ایپ وی بنا دِتی اے جہڑی لوکاں نُوں رہنمائی دیوے گی کہ ملک وچ کہڑے ہسپتال وچ وینٹی لیٹر یاں ہور سہولتاں میسر نیں۔ پیر نُوں وزیراعظم عمران خان دی صدارت ہیٹھ کرونا وایرس دی صورتحال ابرے اجلاس ہویا۔ اجلاس دے بعد میڈیا نال گلبات کردیاں ہویاں وزیراعظم نے کہیا کہ جدوں کوئی ملک لاک ڈاؤن کردا اے تے اوہدا مطلب ایہ نہیں اے کہ کرونا وایرس ختم ہو جاوے گا‘ ایدہا مطلب ایہ اے کہ جہڑی تیزی نال ایہ وایرس کھلردا اے تے لاک ڈاؤن نال ایہ کھلار گھٹ ہو جاندا اے کیوں جے جنے لوک جمع ہوندے نیں اونی تیزی نال ایہ وایرس کھلردا اے۔ وزیراعظم نے کہیا کہ لوکاں دا جمع ہونا تے باہر نکلنا کر دیے تے وباء ختم نہیں ہوندی پر ایہدے کھلار وچ کمی آ جاندی اے‘ اسیں جدوں لاک ڈاوئن کیتا تے لوک اِک مشکل ویلے توں لنگھے‘ بیروزگاری دی انتہا اے تے یومیا اجرت اُتے کم کرن والے طبقے دے گھراں وچ اوکڑاں سن‘ لاک ڈاؤن نال دیہاڑی دار طبقے سنے سبھ بڑے اوکھے ویلے توں لنگھ رہے نیں‘ لاک ڈاؤن دے اثرات معیشت تے متوسط طبقے اُتے پیندے نیں‘ دنیا دا کوئی وی ملک جتھے بُہتیاں مَوتاں ہوئیاں اوہناں ساریاں نے لاک ڈاؤن کھول دِتا پر ایس او پیز دے تحت امریکا جتھے 1 لکھ توں ودھ مَوتاں ہو چکیاں نیں‘ اوہناں نے وی کاروبار کھول دِتا۔ اوہناں نے کہیا کہ ساڈی جدوجہد ایسے لئی اے کرونا ہولی ہولی کھلرے‘ کرونا نے کھلرنا تے ہے پر تیزی نہ کھلرے کیوں جے ایہ تیزی نال کھلر گیا تے ساڈے ہسپتالاں اُتے پریشر ودھے گا جے اسیں ایس او پیز اُتے عمل کریے تے انشاء اللہ ایہنوں سنبھال لواں گے‘ ساڈے خیال وچ کرونا دی شدت جولائی دے آخر وچ یاں اگست وچ آئے گی ایہدے بعد کیسز گھٹ ہونا شروع ہو جان گے۔ وزیراعظم نے قوم توں اپیل کردیاں ہویاں کہیا کہ تُسیں کاروبار کرو‘ دُکاناں کھولو پر ایس او پیز اُتے عملدرآمد ضرور کرو‘ اپنے وڈیاں لئی جہڑے گھر وچ بلڈ پریشر‘ شوگر یاں ہارٹ دے روگی نیں‘ کرونا اوہناں لئی بہت خطرناک اے۔ اوہناں نے ہور کہیا کہ لوک کرونا نُوں سیریز نہیں لے رہے سبھ نُوں کہنا چاہندا آں جے تُسیں لوکاں نے ایس طرحاں بے احتیاطی کیتی تے اسیں اپنے بزرگاں تے بچیاں دے اُتے بہت وڈا ظلم کراں گے‘ ایس لئی جدوں وی تُسیں گھر توں نکلو تے ماسک پا کے نکلو کیوں جے ایہ ثابت ہو چکیا اے کہ ماسک نال کرونا دے کھلار وچ 50 فیصد کمی آندی اے۔