کرونا توں بچان  لئی قومی پدھر تے کوئی قانون بنیا؟ٹڈی دل دے نقصان دی تفصیل وی دیو: سپریم کورٹ۔۔۔٭رویل نیوز٭

اسلام آباد (نیوز ڈیسک) سپریم کورٹ نے وفاقی حکومت نُوں کرونا وایرس دا کھلار روک لئی قانون بنان دی ہدایت کر دِتی جد کہ ہفتے تے ایتوار نُوں مارکیٹاں کھولن دا حکم وی واپس لے لیا‘ سپریم کرٹ نے حکومت توں ملک وچ ٹدی دل دے حملیاں دے نقصانات دی تفصیلات وی منگ لئی۔ تفصیلات مطابق چیف جسٹس پاکستان گلزار احمد دی اگوائی وچ سپریم کورٹ دے چار رکنی بینچ نے کرونا وایرس از خُد نوٹس کیس دی سنوائی کیتی۔ چیف جسٹس نے کہیا کہ حکومت نے حالے تک کرونا توں تحفظ دی قانون سازی نہیں کیتی‘ قومی سطح اُتے کوئی قانون سازی ہونی چاہیدی اے جہدا اطلاق پورے ملک اُتے ہووے گا‘ ملک دے سارے ادارے کم کر سکدے نیں تے پارلیمنٹ کیوں نہیں‘ چین نے وی وباء نال نبڑن لئی فوری قانون بنائے۔ اٹارنی جنرل پاکستان خالد جاوید خان نے دَسیا کہ وفاقی حکومت کرونا تحفظ دے اقدامات کر رہی اے‘ ایس او پیز اُتے عملدرآمد وی یقینی بنائے گی‘ صوبیاں ولوں قانون سازی کیتی گئی اے‘ وفاقی حکومت نُوں وی قانون سازی دیاں تجویز دواں گا۔ جسٹس اعجاز الحسن نے ریمارکس دِتے کہ کرونا وایرس کسے صوبے وچ تفریق نہیں کردا تے لوکاں نُوں مار رہیا اے‘ وفاقی حکومت ایس معاملے اُتے رہنما کردار ادا کرنا چاہیدا اے‘ اوہ کرونا توں بچاء لئی قانون سازی کرے‘ تہاڈے کول ہُن ویلا نہیں رہیا‘ 1 لکھ توں ودھ کرونا مثبت کیس آ گئے نیں۔ چیف جسٹس نے کہیا کہ موجودا حالات وچ لوکاں دیاں زندگیاں نُوں خطرات لاحق نیں‘ پریس کانفرنس راہیں لوکائی دا تحفظ نہیں ہووے گا سگوں قانون بنن تے اوہدے اُتے عمل نال ہووے گا۔ جسٹس اعجاز الحسن نے ہدایت کیتی کہ ڈاکٹرز نُوں حفاظتی سامان ہر حال وچ دستیاب ہونا چاہیدا اے‘ خدانخواستا حفاظتی سامان نہ ہون نال کوئی نقصان ہویا تے تلافی نہیں ہووے گی‘ طبی ورکرز دی ہلاکت اُتے وزیر اعلا صرف جا کے معاوضے دا اعلان کر دیندے نیں۔ اوہناں نے کہیا کہ لوکاں وچ وی حالے تک اگاہی نہیں آئی‘ عید دے موقع اُتے اوہناں نے ایس او پیز نُوں نظر انداز کر دِتا۔ چیف جسس نے کہیا کہ پولیس والیاں نُوں دُکانداراں تے خریداراں توں پیسے لین دی اجازت دے دِتی گئی اے‘ کس طرحاں ایس او پیز اُتے عمل ہووے گا۔ عدالت نے ہفتے تے ایتوار نُوں مارکیٹاں کھولن دا حکم وی واپس لے لیا جد کہ حکومت توں ملک وچ ٹڈی دل حملیاں دے نقصان دی تفصیلات منگدیاں ہویاں سنوائی 2 ہفتیاں لئی ملتوی کر دِتی۔