بجلی دے ٹیرف‘ کھاد اُتے ڈیوٹی تے زرعی قرضیاں اُتے مارک اپ گھٹ کراں گے: عبدالحفیظ شیخ...٭رویل نیوز٭

اسلام آباد (نمایندا رویل) وزیراعظم دے مشیر برائے خزانا تے ریونیو ڈاکٹر عبدالحفیظ شیخ نے کہیا اے کہ حکومت ملک وچ کاروبار دے فروغ‘ روزگار دے مواقع پیدا کرن تے اقتصادی ترقی لئی اقدامات کر رہی اے‘ اگلے بجٹ وچ بزنس کمیونٹی دیاں تجویزاں نُوں غور ہیٹھ لیاندا جا رہیا اے۔ تفصیلات دے مطابق اوہناں نے پیر نُوں فنانس ڈویژن وچ اِک اجلاس دی صدارت کیتی جہدے وچ چیئرمین بزنس کمیونٹی سراج قاسم تیلی تے کراچی چیمبرز آف کامرس اینڈ انڈسٹری دے نمایندیاں نے رلت کیتی۔ ایس موقع اُتے کراچی دی بزنس کیونٹی ولوں بجٹ تجویزاں اُتے وچار وٹاندرا کیتا گیا۔ گرُپ نے مشیر خزانا توں درخاست کیتی کہ اوہ ممکنا طور اُتے ٹیکساں وچ کمی تے کاروباری بندیاں لئی انکم ٹیکس ریفنڈ دے عمل وچ تیزی لیان دے معاملے نُوں ویکھن۔ اوہناں نے مشیر خزانا نُوں دَسیا کہ بزنس کمیونٹی نُوں اوہناں دیاں کاروباری سرگرمیاں وچ سہولت فراہم کرن لئی ٹھوس اقدامات چُکے جان۔ ایس موقع اُتے مشیر خزانا نے گرُپ نُوں یقین دہانی کروائی کہ حکومت آن والے بجٹ وچ ایہناں تجویاں نُوں مناسب انداز وچ غور ہیٹھ لیا رہی اے تے کاروباری کمیونٹی دے نال تعاون جاری رکھی گی تاں جے اوہناں دے کاروبار نُوں فروغ ملے تے ملک وچ روزگار مہیا تے اقتصادی ترقی ہووے۔ایس توں وکھ مشیر خزانا نے زرعی شعبے لئی اعلا ن کردا 50 ارب رُپئے چھیتی ونڈن دا اعلان وی کیتا۔اوہناں دا کہنا سی کہ کاشتکاراں تے کساناں دی بھرویں مدد کیتی جاوے گی‘ کاشتکاراں دیاں بجٹ بارے قابل عمل تجویزاں نُوں بجٹ وچ شامل کراں گے‘ کاشتکاراں نُوں براہ راست ریلیف دی فراہمی حکومت دی ترجیح اے‘ بجلی دے ٹیرف‘ کھاد اُتے ڈیوٹی تے زرعی قرضیاں اُتے مارک اپ گھٹ کراں گے‘ 50 ارب دے زرعی پیکج دی موزوں ونڈ لئی تجویزاں نُوں خُش آمدید کہواں گے‘ کرونا وباء اُتے قابو پان دے بعد زرعی شعبا نمایاں ترقی کر سکدا اے۔