غزل/ارشاد سندھو

شُکر اے ویلے نال ردیفاں

میں لینا واں ڈھال ردیفاں

رب دا ناں ای ایتھوں اوتھوں

چُک کے انج نہ گال ردیفاں

تیتھوں چنگیاں ساڈے پِنڈ وچ

لئی پِھردے نیں بال ردیفاں

یاد نیں اج وی کھوہ دی راہ تے

راہ وچ ملیاں لال ردیفاں

مصرعے انج نہ رُلدے جیکر

رل کے لیندے پال ردیفاں

فر ویکھاں گے پہلاں کِدھرے

جا تے جا کے بھال ردیفاں

اوس غزل لئی غزلاں لِکھیاں

رکھ کے دِل دا حال ردیفاں

اوہدا کرم اے سندھو نویاں

لے آؤندا ہر سال ردیفاں