لاہوردے ہسپتال کرونا نال بھر گئے،خطرناک فیز وچ داخل،ڈاکٹراں ،نرساں تے ہور عملے وچ تشویش دی لہر۔۔۔٭رویل نیوز٭

لاہور(رویل نیوز)کرونا دی وبا نے پوری دُنیا نوں اپنی لھویٹ وچ لیا ہویا اے جس کر کے دُنیا ایس روگ نال لڑ رہی اے تے کئی ترقی یافتا مُلکاں وچ ایس اُتے قابو پا لیا گیا اے پر ساڈے دیس وچ حالات قابو توں باہر ہو گئے نیں۔جدوں دا سمارٹ لاک ڈاؤن شروع کر کے مارکیٹاں تے شاپنگ مالز کھولے گئے نیں روز دے چار توں پنج ہزار روگی ودھن لگ گئے نیں تے واصل ہوون والیاں دی گنتی وی سو دے لگ بھگ اپڑ گئی اے۔لاہور دے وڈے ہسپتالاں وچ کرونادے روگیاں واسطے کوئی تھاں نہیں بچی اے کوٹ خواجا سعید تےجنرل ہسپتال وچ تعداد پوری ہو گئی اے،سروسز وچ ستر فیصد روگی آ گئے نیں ایس توں وکھ وینٹی لیٹرز دی گھاٹ نوں وی بڑی شدت نال محسوس کیتا جا رہیا اے۔ایس طرحاں روگیاں دی تعداد ودھن نال ایہ وی ہویا اے کہ ہسپتال وچ کم کرن والیاں ڈاکٹراں،نرساں تے ہور میڈیکل شعبے نال جُڑے ملازماں وچ کرونا روگ دی ہوند نے سبھ وچ تشویش دی لہر پیدا کر دتی اے۔ایس طرحاں دے حالات وچ کرونا دے نویں روگیاں نوں اوکڑاں دا ساہمنا اے جو ہر لمحے ودھ ای رہیاں نیں۔