ملک دی سیوا کرنا جرم اے تے ایہ جرم وار وار کراں گا،وزارت دوران 1 رُپیا تنخاہ لئی:شہباز شریف۔۔۔٭رویل نیوز٭

لاہور (نمایندا رویل) مسلم لیگ ن دے صدر تے قائدحزب اختلاف شہباز شریف منی لانڈرنگ آمدن توں ودھ اثاثا جات کیس وچ نیب دی ٹیم دے ساہمنے پیش ہو گئے۔ نیب وسیلیاں دے مطابق تفتیشی ٹیم دے ساہمنے پیشی دے موقع اُتے شہباز شریف نے بیرون ملک بنائے گئے اثاثیاں بارے تحریری جوا ب جمع کروایا‘نیب ٹیم نے شہباز شریف دے ساہمنے 37 سوالات رکھے جہناں وِچوں شہباز شریف نے 13 سوالاں اُتے مشتمل جواب نیب دی تفتیشی ٹیم نُوں دِتا‘ شہباز شریف نے انیل مسرت توں حاصل کیتے گئے قرضے دی تفصیلات وی فراہم کیتی۔ نیب وچ پیشی دوران شہباز شریف توں پُچھیا گیا کہ دَسّور بار کلے بینک توں کنا قرض لیا۔ شہباز شریف نے ہارون یوسف تے عاصمہ داڑ توں لئے گئے قرض دی تفصیل وی دَسی۔ نیب وسیلیاں مطابق شہباز شریف دے ساہمنے فنانشل مانیٹرنگ یونٹ دی رپورٹ رکھی گئی تے 4 مشکوک ٹرانزیکشن بارے وی پُچھیا گیا۔ نیب ولوں کہیا گیا کہ تہاڈے خلاف 7 ارب رُپئے دا ریفرنس تیار اے‘ کوئی جواب ہے تے دَس دوو تہاڈے بیان ریکارڈ کر کے ریفرنس دا حصا بنایا جاوے گا‘ جہدے اُتے شہباز شریف نے صرف اینا کہیا کہ میں بطور وزیرا علا پنجاب اِک رُپیا تنخاہ لئی اے تے نہ ای اِک دھیلے دی کرپشن کیتی اے‘ ملک دی خدمت کرنا جرم اے تے ایہ جرم وار ور کراں گا‘ ملک وچ ارباں رُپئے دے منصوبے بنائے نیں‘ قوم دی اِک اِک پائی نُوں امانت سمجھ کے خرچ کیتا اے۔ ایہناں منصوبیاں وچ ساڈی کرپشن وکھا دوو‘ اج وی لوک ساڈے دور دیاں مثالاں دیندے نیں‘ اِک سوال دے جواب اُتے شہباز شریف نے کہیا کہ اپنی بیگم نُوں گفٹ دینا کوئی غلط کم نہیں اے۔