کرونا روگیاں تے موتاں وچ خطرناک وادھا٭ گھٹ توں گھٹ دو ہفتے دامکمل لاک ڈاؤن لاون لئی عالمی اداراصحت دی پنجاب سرکار نوں چِٹھی۔۔۔٭رویل نیوز٭

لاہور (نمایندا رویل) ملک وچ پچھلے 24 گھنٹیاں دے دوران کرونا وایرس دے 4646 نویں کیسز‘ 105 مَوتاں رپورٹ ہوئیاں نیں جہدے بعد تصدیق شدا کیسز 1,08,317 تے مَوتاں 2172 ہو گئیاں نیں۔ نیشنل کمانڈ اینڈ اپریشن سینٹر (این سی او سی) دی تازا ترین اپ ڈیٹ ڈ یٹ دے مطابق پورے ملک وچ کرونا وایرس دے ایکٹو کیساں دی گنتی 71 ہزار 127 ہو گئی اے۔ این سی او سی دے مطابق پنجاب وچ کرونا وایرس دے کیسز دی گنتی سبھ توں ودھ 40 ہزار 819 تک پہنچ گئی اے۔ این سی او سی دے مطابق پچھلے 24 گھنٹیاں وچ 105 مَوتاں ہوئیاں تے 4646 نویں کیس ساہمنے آئے نیں جد کہ 24 ہزار 620 ٹیسٹ کیتے گئے۔ ملک دے 775 ہسپتالاں وچ 5255 روگی علاج ہیٹھ نیں۔ پورے ملک وچ فراہم کیتے گئے آکسیجن والے بیڈز دی گنتی 5137 اے۔ این سی او سی دے مطابق ہیلتھ ورکرز تے فرنٹ لائن ہیروز لئی وی سپیشل پیکج دا اعلان کیتا جاوے گا۔ایس توں وکھ پورید نیا وچ کرونا نال متاثر ہون والیاں دی گنتی 7199306 ہو گئی ا ے جد کہ ہلاکتاں دی گنتی 408734 تک اپڑ گئی اے۔دوجے پاسے عالمی ادارا صحت (ڈبلیو ایچ او) نے حکومتاں نُوں مشورا دِتا اے کہ لاک ڈاؤن وچ نرمی کرن وچ چھیتی نہ کرن۔ عالمی ادارا صحت دے ڈائریکٹر جنرل ٹیڈروس اڈھانوم گیبریس نے کہیا اے کہ اِک پاسے یورپ وچ کرونا دی صورتحال وچ بہتری آ رہی اے تے دوجے پاسے دنیا وچ صورتحال خراب ہوندی جا رہی اے۔ پریس بریفنگ دوران اوہناں نے دنیا نُوں خبردار کیتا اے کہ پچھلے 9 دن روزانا 1 لکھ توں ودھ کیسز رپورٹ ہوئے‘ پچھلے دن 75 فیصد کیسز صرف 10 ملکاں وچ ساہمنے آئے‘ ایہ کیسز امریکی تے جنوبی ایشیائی ملکاں توں رپورٹ ہوئے۔ اوہناں نے کہیا کہ وایرس دے کھلار اُتے گوڑھی نظر رکھی ہوئی اے‘ اِک واری فیر سبھ نُوں گھر اُتے رہن دا مشورا دیندے آں۔ ایس توں وکھ عالمی ادارا صحت (ڈبلیو ایچ او) نے پنجاب سرکار نُوں خط راہیں پورے صوبے وچ گھٹ توں گھٹ دو ہفتے دے مکمل لاک ڈاؤن نُوں ویلے دی لوڑ مِتھ دِتا اے۔ ڈبلیو ایچ او نے کرونا روگیاں دی ودھدی ہوئی گنتی تے مَوتاں اُتے خطرے دی گھنٹی وجا دِتی تے کہیا کہ کرونا دی روک تھام لئی ایس او پی اُتے عملدرآمد بہت ضروری اے۔ ڈبلیو ایچ او ولوں لکھے گئے خط وچ تجویز کیتا گیا اے کہ پنجاب وچ گھٹ توں گھٹ دو ہفتے لئی مکمل لاک ڈاؤن ویلے دی ضرورت اے۔ خط دے متن مطابق کرونا دے مثبت کیسز دی گنتی 1 لکھ توں ودھنا خطرے دی گل اے‘ خط وچ کہیا گیا اے کہ لاک ڈاؤن ویلے روزانا 1 ہزار کیسز رپورٹ ہو رہے سن‘ نرمی نال یومیا گنتی 2 ہزار تے لاک ڈاؤن ختم کرن نال کیسز دی گنتی 4 ہزار توں ودھ گئی اے د کہ ایس او پیز اُتے سختی نال عملدرآمد نہیں ہو رہیا اے‘ پنجاب وچ کرونا دے روزانا 50 ہزار ٹیسٹ ہونے چاہیدے نیں۔