کرونا وایرس  اک سازش  اے ایس نوں بناوٹی ڈھنگ نال بنایا گیا٭   برجر سورینسن تے برطانوی پروفیسر اینگس ڈلگیش  دا دعوا۔۔۔٭رویل نیوز٭

لندن (نمایندا رویل) برطانیا تے ناروے نال تعلق رکھن والے سائنسداناں نے دعوا کیتا اے کہ دنیا نُوں مفلوج کرن والی عالمی وباء کرونا وایرس قدرتی نہیں سگوں ایہنوں اِک وڈی سازش دے تحت لیبارٹری وچ بنایا گیا اے۔ غیر ملکی خبر رساں ادارے دے مطابق سائنسداناں دا کہنا اے کہ چین دے شہر ووہان توں شروع ہو کے پوری دنیا نُوں اپنی لھویٹ و چ لین والا کرونا وایرس اِک خاص عمل دے تحت لیبارٹری وچ تیار کیتا گیا اے۔ رپورٹ د ے مطابق ایہ دعوا ناروے دے برجر سورینسن تے برطانوی پروفیسر اینگس ڈلگیش نے برطانوی انٹیلی جنس ادارے ایم آئی 6 دے پچھلے آگو سر رچرڈ ڈیئر لو دی معاونت نال ہون والی اِک تحقیق وچ کیتا اے۔ کرونا حیاتیاتی ہتھیار‘ جان بُجھ کے کھلاریا گیا‘ سائنسداناں دا کہنا اے کہ کرونا وایرس دی ظاہری جھلی ایہو جہی تیز نوک دار پروٹین نال بنی ہوئی اے جہڑی مصنوعی طور اُتے داخل کیتے گئے نیں جد کہ تحقیق وچ ایس گل نُوں وی واضح کیتا گیا اے کہ انسانی جسم وچ دریافت ہون دے بعد توں کرونا وچ بہت گھٹ تبدیلی ویکھی گئی اے جہدے نال ظاہر ہوندا اے کہ اِک سازش دے تحت پہلے ای انساناں لئی ڈھالیا گیا اے۔ سائنسداناں دا کہنا اے کہ خصوصیات دے لحاظ نال کرونا سارس توں بلکل وکھرا اے‘ ایہ خصوصیات پہلے کدی نہیں ویکھیاں گئیاں۔ اوہناں نے وضاحت کیتی کہ چین تے امریکا نے کرونا وایرس اُتے کئی عرصے تک سانجھی تحقیق کیتی اے جہدے وچ وایرس دے ودھن‘ کھلرن تے منتقلی دی صلاحیت بارے مطالعا وی کیتا گیا۔ برطانوی خفیا ایجنسی دے آگو سر ڈیئر لو دے مطابق تحقیق نال ایہ گل ساہمنے آئی اے کہ دنیا نُوں مفلوج کرن والا مہلک وایرس لیب وچ بنایا گیا اے‘ اوہناں نے ایہ وی کہیا کہ ہو سکدا اے کہ تجربے دے دوران ایہ واریس ناقص انتظامات دے کارن کھلر گیا ہووے۔ کرونا 30 توں 40 سال دے جواناں نُوں بُری طرحاں متاثر کر سکدا اے۔