کرونا دی آڑ مہنگائی مافیا دا لوکاں اُتے بھار پانا انتہائی افسوسناک،پٹرولیم دی قیمت وچ گھاٹ دا لوکائی نوں نقصان ہو رہیا،بناوٹی بحران پیدا کیتا گیا: عمران خان۔۔۔٭رویل نیوز٭

اسلام آباد (نمایندا رویل) وفاقی کابینا دے منگل نُوں ہون والے اجلاس وچ ملک دے مختلف حصیاں وچ پٹرول دی تھوڑ دا سخت نوٹس لیا گیا‘ وزیراں نے ذمے داراں خلاف فوری کارروائی دا مطالبا کیتا ایہدے اُتے وزیراعظم عمران خان نے کہیا کہ اوہناں نُوں وی پٹرول بحران اُتے سخت تشویش اے‘ 1 رُپیا قیمت ودھائیے تے ہر شے مہنگی ہو جاندی اے ہُن 7 رُپئے پچھلے مہینے گھٹ کیتے‘ مہنگائی گھٹ ہوئی نہ ای پٹرول لوکاں نُوں سستے بھاء دِتا جا رہیا اے‘ جہناں نے ایہ مصنوعی بحران پیدا کیتا اوہناں خلاف سخت کارروائی ہووے گی۔ وسیلیاں دے مطابق وزیراں نے پٹرول بحران اُتے وفاقی وزیر برائے توانائی عمر ایوب توں سخت سوالات کیتے تے کہیا کہ دَسیا جاوے کہ ایہ مصنوعی بحران کون پیدا کر رہیا اے کیوں جے وزارت پٹرولیم دی غفلت نال لوکائی رُسوا تے خوار ہو رہی اے‘ قیمتاں وچ کمی دا فایدا ہون دی بجائے لوکائی نُوں نقصان ہو رہیا اے۔ پٹرول پمپاں دے باہر لوکاں دیاں لمیاں لایناں نیں‘ ایہدے نال حکومت دی بدنامی ہو رہی اے۔ وفاقی وزیر مراد سعید نے کہیا کہ متعلقا وزارت تے ویزر نُوں بری الذمہ متھیا نہیں جا سکدا۔ اجلاس وچ فیصلاکیتا گیا کہ اوگرا سنے جہڑا وی ذمے دار ہویا اوہدے نال رعایت نہیں ورتی جاوے گی۔ وزیراں نے ایہ وی کہیا کہ پٹرول دا وادھو ذخیرا موجود اے پر ایہدے باوجود مصنوعی تھوڑ پیدا کیتی گئی۔ وفاقی وزیر برائے ایوی ایشن غلام سرور خان نے کہیا کہ کہیا جا رہیا اے کہ ملک وچ صرف 7 دن دے پٹرول دا ذخیرا اے۔ وفاقی وزیر توانائی عمر ایوب نے کہیا کہ ملک وچ سوا 2 لکھ میٹرک ٹن توں ودھ پٹرول دا ذخیرا موجود اے‘ عالمی منڈی وچ پٹرول دی قیمت ودھی تے کجھ کمپنیاں نے خریداری روک دِتی جہدے اُتے اوہناں خلاف کارروائیاں کیتیاں جا رہیاں نیں تے جہناں آئل کمپنیاں نے سٹاک ختم کیتا اوہناں دے لائسنس منسوخ کیتے جا رہے نیں‘ اوگرا آئل کمپنیاں خلاف ایکشن لے رہیا اے‘ معاون خصوصی ندیم بابر نے کہیا کہ اِک دو دن وچ وادھو ماترا وچ پٹرول دستیاب ہووے گا۔ وسیلیاں مطابق اجلاس وچ شوگر انکوایری رپورٹ دے تناظر وچ وزیراعظم د ے اقدامات تے فیصلیاں دی توثیق کیتی گئی تے فرانزک رپورٹ دی روشنی وچ کارروائی دیاں سفارشاں نُوں منظور کر لیا گیا جد کہ وفاقی کابینا نے اقتصادی رابطا کمیٹی دے فیصلیاں دی توثیق کردیاں ہویاں پاکستان سٹیل ملز دی نجکاری دی منظوری دے دِتی۔اجلاس دوران وزیراعظم دا کہنا سی کہ پاکستان سٹیل ملز دی نجکاری دے ویلے ملکی مفاد دے نال نال مزدوراں دے فایدے دا وی خیال رکھیا جاوے۔ وزیرعظم دا کہنا سی کہ بلا امتیاز احتساب تحریک انصاف دے منشور دا حصا اے‘ پی ٹی آئی نُوں احتساب دے منشور اُتے لوکائی نے ووٹ دِتا‘ کسے نُوں وی اختیارات دے ناجایز استعمال نال دولت بنان دی اجازت نہیں دِتی جاوے گی۔ وزیراعظم نے کہیا کہ بنیادی لوڑی دیاں شیواں دی مناسبت قیمتاں اُتے دستیابی پہلی ترجیح اے‘ تحقیقاتی رپورٹ دی روشنی وچ لوکائی دی جیب اُتے ڈاکا مارن والیاں خلاف کارروائی لئی متعلقا اداریاں نُوں کیسز گھل دِتے نیں‘ سیاست نُوں کاروبار لئی استعمال کرن والیاں توں حساب لیا جاوے گا۔ وزیراعظم نے کہیا کہ پٹرول دی مصنوعی تھوڑ دی ایہ صورتحال برداشت جوگ نہیں تے ایس حوالے توں سخت فیصلے اگلے 24 گھنٹیاں وچ کیتے جان گے۔ایس موقع اُتے وفاقی وزیراں نے پرائیویٹ ہسپتال مافیا خلاف وی ایکشن دا مطالبا کیتا تے کہیا کہ پرائیویٹ ہسپتال مافیا غریب لوکائی نُوں لُٹن دی منصوبا بندی کر رہیا اے۔ پرائیویٹ ہسپتال مافیا کرونا دے چکر وچ لوکائی دیاں جیباں وچ ہتھ پا رہے نیں‘ ایس لئی ضروری اے کہ صوبائی حکومتاں نُوں انتظامی معاملات بہتر کرن دی ہدایت کیتی جاوے۔ وزیراعظم نے کہیا کہ کرونا دی آڑ وچ ایس قسم دے مافیا دا لوکاں اُتے بھار پانا انتہائی افسوسناک اے اوہ پہلے وی کسے مافیا دے ساہمنے نہیں جھُکے سن تے ہُن وی نہیں جھُکن گے کیوں جے جہڑا لوکائی نُوں لُٹے گا تے لُٹ مار وچ ملوث ہووے گا اوہناں خلاف سخت ایکشن لیا جاوے گا۔