مونہ چڑھاندیاں سرکاری ریٹ دیاں پرچیاں ……٭رویل٭

مونہ چڑھاندیاں سرکاری ریٹ دیاں پرچیاں

بندا بشر

روزیاں توں اِک ہفتا پہلاں ای سرکار ولوں ذخیرا اندوزی کرن والیاں خلاف چنگیاں تے چوکھیاں سزاواں والا آرڈیننس پاس ہویا تاں لوکائی وچ خُشی دی لہر اُٹھی کہ حالات بدل جاون گے۔لوکائی سمجھن لگے کہ ہُن لوکائی نوں لُٹیانہیں جاوے گا۔سرکاری ریٹاں دی پرچی دا ایہ مقصد ہوندا اے کہ لوکائی نال کسے قسم دا دھرو نہ کیتا جاوے اوہناں دی قوت خرید انوسار ای حالات رہن۔سرکار اپنا چیک اینڈ بیلنس رکھن لئی منافع خوراں نوں وی قابو وچ رکھدی اے تے شیواں دی آوا جاوی اُتے وی نظر رکھدی اے۔پر موجودا حکومت نے جہڑے نعرے لائے سن جہڑے لوکائی واسطے آرڈیننس بنائے سن تے جہڑیاں اسمانا ں نوں ٹاکی لاون والیاں گلاں کیتیاں جا رہیاں سن اوہ اُکا ای ایس توں اُلٹ لوکائی نال ہو رہیا اے۔رمضان دے پاک مہینے دے مُڈھ توں ای ایہ حالات بن گئے نیں کہ ویچن والیاں نے من مرضی دیاں مُلاں نال شیواں نوں ویچنا شروع کیتا ہویا اے۔

برائلر دا ریٹ روزیاں توں دو دِن پہلاں اِک سو پنتالی روپے سی جو پہلے روزے ای دو سو کر دتا گیا،تے جو عید توں بعد چار سو روپےہو گیا ۔ سرکار نے اپنا پورا جتن کیتا کہ دو سوسٹھ روپے ریٹ چلایا جاوے پر کوئی وی نہیں ہو سکیا تے چکن ویچن والیاں نے ہٹ دھرمی وکھاندیاں ہوئیاں ہڑتال دی دھمکی لا لئی تے ریٹ لسٹ نوں مونہ چڑھا دتا۔۔۔۔۔

نِنبو نوں جویں اگ لگ گئی ہووے سو روپے کِلو وِکن والا ننبو اک دن وچ ای چار سو روپے تک جا اپڑیا سی ہن قیمت نوں کنٹرول کرن دا جتن کیتا جا رہیا اے ایسے طرحاں تھوم ادرک دیاں قیمتاں بارے وی ویکھیا جا سکدا اے جو لوکائی نوں سرکاری ریٹ تے نہیں مل رہیا اے۔۔۔ریٹ لسٹ چلدی چلدی پٹرولیم مصنوعات دی وی سُن لو جدوں دا چہتر روپے لیٹر ہویا اے نایاب ہو گیا اے لوکائی سڑکاں تے رُل گئی اے۔کیہ قیمت کنٹرول کرن والے اداریاں نے اپنا کم کیتا؟ ایہدا جواب ایہ ای اے کہ کدے نہیں کیتا فیر کیوں نا ایہناں نوں ای مکا کے لوکائی توں بھار گھٹ کر دتا جاوے۔لوکائی ڈردی اے کہ حالات نوں خراب کرن والیاں نوں سرکار کدے وی کجھ نہیں کہہ سکدی اے کیوں جے سرکار وچاری بے بس جہی اے۔ایہ بے بسی ہسپتالاں وچ وی ویکھی جا سکدی اے۔

ہر روز دی ضرورت وچ آٹا سبھ توں اُچیچ رکھدا اے جو سال دے مُڈھ وچ جنوری دے وچکار جا کے تھوڑے حالات خراب ہویا کردے سن پر سرکار اوس اُتے قابو پا لیندی سی پر ہُن آٹا چکیاں تے فلور ملز والیاں نے من مانی قیمت اُتے ویچن دا فیصلا کیتا اے تے سرکار نوں فیر بے بس کر دتا ۔پٹرولیم مصنوعات سستیاں ہون کر کے آٹا چالھی توں وی تھلے آنا چاہیدا اے جو پینٹھ روپیاں تک جا اپڑیا اے۔جے انج ای سبھ ہونا اے تے فیر ماڑیاں مہاتڑاں نوں جین دی بجائے پھاہے لوا ن دا حکمناما جاری کر دتا جاوے تاں ٹھیک رہوے گا۔

سرکاری ریٹ روز اپنی ریٹ والی پرچی گھلدی اے جس نوں دُکاناں دیاں نُکراں وچ ٹنگیا جاندا اے تاں جو ایس نوں لوکائی ویکھے تے بس ویکھدی اے رہوے کوئی سرکاری اہلکار ایس ریٹاں تے عمل کراون لئی تیار نہیں اے۔ کسے وی شے دی لوکائی سرکاری ریٹ والی پرچی ویکھ کے کہندی اے کہ ایہدا کیہ قصور اے تاں اگوں کہیا جاندا اے سانوں جہڑے مُل مل رہی اے اسیں اوسے مُل وی دئیے تاں سرکاری ریٹ نہیں بن سکدا۔