قومی اقتصادی کونسل دا اجلاس:وفاق تے صوبائی حکومتاں وچکار قریبی تے برابری دی بنیاد اُتے تعاون نُوں یقینی بنا یا جاوے،ترقیاتی منصوبے پہلی ترجیح نیں:عمران خان۔۔٭رویل نیوز٭

اسلام آباد (نمایندا رویل) وزیراعظم عمران خان نے کہیا اے کہ کرونا وباء دے پیش نظر نوجواناں نُوں روزگار دین والے شعبا جات‘ زرعی شعبے تے پبلک ہیلتھ سسٹم نُوں اپ گریڈ کرنا حکومت دی پہلی ترجیح اے‘ ترقیاتی منصوبیاں نوں حتمی شکل دین تے ایہدے اُتے عملدرآمد وچ وفاق تے صوبائی حکومتاں وچکار قریبی تعاون یقینی بنایا جاوے‘ جاری منصوبیاں اُتے ٹورا کاری نُوں مانیٹر تے ویلے سر عملدرآمد لئی ٹیکنالوجی دا استعمال تے عوامی رلت ضروری اے۔ قومی اقتصادی کونسل دا اجلاس بدھ نُوں وزیراعظم عمران خان دی صدارت ہیٹھ ہویا۔ اجلاس وچ چالو مالی سال 2019-20 دوران معاشی صورتحال تے مالی سال 2021-20 لئی منظر نامے دا جایزا لیا گیا۔ اجلاس نُوں دَسیا گیا کہ کووڈ 19 دباء دی وجھا توں موجودا حکومت دی بھرویاں کوششاں بُری طرحاں متاثر ہون دے بعد معاشی رفتار نُوں تیزی ول ممکن بنایا گیا۔ اجلاس وچ معیشت دی بحالی خاص طور اُتے معاشرے دے غریب طبقے نُوں لاک ڈاؤن دے اثرات توں محفوظ بنان لئی موجودا حکومت دے اقدامات نُوں سلاہیا گیا۔ اجلاس وچ مالی سال 2020-21 لئی زراعت‘ صنعت تے سروسز سنے ہور شعبا جاتی پیداوار دے نال نال شرح نمو دے ہدف دی منظوری دِتی گئی۔ این ای سی ولوں مائیکرو اکنامک فریم ورک دے حوالے توں مجوزا سالانا منصوبا 2020-21 دی وی منظوری دِتی گئی۔ این ای سی نے مالی سال 2019-20 لئی پبلک سیکٹر ڈویلپمنٹ پروگرام دا تفصیلی جایزا لیا تے 2020-21 لئی مجوزا ترقیاتی منصوبا پیش کیتا۔ اجلاس نُوں دَسیا گیا کہ وفاقی حکومت ولوں چُکے گئے متعدد اقدامات نال اہم ترقیاتی سکیماں اُتے ویلے سر عملدرآمد راہیں ترقی دے عمل نُوں فروغ مِلیا اے۔ ایہناں اقدامات وچ محکما جاتی ترقیاتی ورکنگ پارٹی (ڈی ڈی ڈبلیو پی) دے اختیارات نُوں 60 ملین رُپئے توں 2 ارب رُپئے‘ مرکزی ترقیاتی ورکنگ پارٹی (سی ڈی ڈبلیو پی) 3 ارب توں 10 ارب رُپئے تے ایکنک لئی 10 ارب رُپئے توں ودھ منصوبا جات دی منظوری دِتی گئی اے۔ ایہدے نال نال ایس اے پی سسٹم راہیں اخراجات دے حوالے توں ویلے سر معلومات تے ترقیاتی عمل دی تکمیل لئی نجی شعبے نُوں شامل کرن دے حوالے توں پبلک پرائیویٹ پارٹنر شپ دا قیام شامل اے۔ ایہ وی دَسیا گیا کہ 30 جون 2020 تک 827 ارب رُپئے لاگت دے 149 منصوبے مکمل ہون گے یاں مکمل ہون دی توقع اے۔ اجلاس نُوں دَسیاگیا کہ 2020-21 لئی پی ایس ڈی پی منصوبا جات لئی خاص طور اُتے گھٹ ترقی یافتا علاقیاں بشمول بلوچستان‘ ضم شدا خیبر پختونخوا دے علاقیاں‘ گلگت بلتستان تے ازاد کشمیر وچ ترقی اُتے توجا دِتی جا رہیا ے۔ ایس موقع اُتے خطاب کردیاں ہویاں وزیراعظم عمران خان دا کہنا سی کہ کرونا وایرس وباء دے پیش نظر حکومت دی ترجیح اوہ شعبا جات نیں جہڑے نوجواناں نُوں روزگار دے رہے نیں‘ ایہدے علاوا زرعی شعبا تے پبلک ہیلتھ سسٹم نُوں اپ گریڈ کرن اُتے توجا دِتی جا رہی اے۔ وزیراعظم نے ایس گل اُتے زور دِتا کہ ترقیاتی منصوبیاں نُوں حتمی شکل دین تے ایہدے اُتے عملدرآمد دوران وفاق تے صوبائی حکومتاں وچکار قریبی تے برابری دی بنیاد اُتے تعاون نُوں یقینی بنان دی ضرورت اے۔ وزیراعظم نے جاری منصوبا جات اُتے ٹورا کاری نُوں مانیٹر کرن لئی ٹیکنالوجی دے استعمال دی لوڑ اُتے وی زور دِتا۔ ایس حوالے توں وزیراعظم نے ویلے سر معلومات تے منصوبا جات اُتے عملدرآمد دے حوالے توں فیڈ بیک لین راہیں ترقیاتی عمل وچ عوامی رلت نُوں یقینی بنان اُتے زور دِتا۔ وزیراعظم نے کہیا کہ پی ایس ڈی پی منصوبا جات دی ٹورا کاری دا جایزا لین لئی قومی اقتصادی کونسل دا سالانا اجلاس منعقد کیتا جاوے۔ قومی اقتصادی کونسل 2020-21 لئی قومی ترقیاتی منصوبے تے وفاقی پی ایس ڈی پی دی منظوری دِتی۔ اجلاس وچ پائیدار ترقیاتی مقصاد اُتے سٹرٹیجک رہنمائی دی فراہمی‘ نگرانی دا عمل برقرار رکھن تے بین الصوبائی تعاون نُوں یقینی بنان لئی این ای سی سب کمیٹی بنان دی منظوری وی دِتی گئی۔