کرونا دی وجھا توں حالات خراب نیں معاشی ترقی ول پورا دھیان اے،روزگار  تے وسایل ودھانے نیں:سردار عثمان بزدار۔۔۔٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار دی صدارت ہیٹھ وزیر اعلا آفس وچ ریسورس موبلائزیشن کمیٹی دا خصوصی اجلاس منعقد ہویا‘ 3 گھنٹے لمے اجلاس وچ صوبے دے وسایل وچ وادھے دے حوالے توں مختلف تجویزاں دا تفصیلی جایزا لیا گیا۔ وزیر اعلا عثمان بزدار نے اجلاس نال خطاب کردیاں ہویاں کہیا کہ کرونا وباء کارن غیر معمولی حالات توں لنگھ رہے آں‘ کمزور طبقے اُتے پہلے بھار پایا نہ اگے پاواں گے‘ ساڈا محور کمزور طبقے دا تحفظ اے‘ بجٹ وچ کمزور طبقے دا پورا خیال رکھیا جاوے گا۔ اوہناں نے کہیا کہ صوبے دے وسایل وچ وادھے لئی منفرد طریقے نال اقدامات کیتے جان گے۔ عام بندے دیاں اوکڑاں تے لوڑاں نُوں ساہمنے رکھ کے اقدامات تجویز کیتے جان‘ متعلقا محکمے اپنے اہداف دے حصول دے حوالے توں جامع حکمت عملی وضع کرن۔ اوہناں نے کہیا کہ لوکائی نُوں ریلیف دی فراہمی لئی بھرویں کوشش کیتی جاوے‘ پنجاب وسایل دی دولت نال مالا مال اے‘ ضرورت ایس امر دی اے کہ ایہناں وسایل توں حقیقی معنیاں وچ فایدا چُک کے معیشت نُوں مستحکم کیتا جاوے‘ صوبے دے مالی وسایل وچ وادھے لئی نویں اقدامات اُتے توجا دِتی جاوے۔ اوہناں نے کہیا کہ معاشی سرگرمیاں تیز ہون نال روزگار دے نویں موقع پیدا ہون گے۔ وزیر اعلا عثمان بزدار نے صوبے دے وسایل وچ وادھے لئی تجویزاں نُوں حتمی شکل دین لئی کمیٹی بنا دِتی اے‘ سینئر صوبائی وزیر عبدالعلیم خان کمیٹی دے آگو ہون گے‘ کمیٹی تجویزاں نُوں حتمی شکل دے کے جامع پلان پیش کرے گی۔