کھنڈ سکینڈل انکوایری کمیٹی دی رپورٹ چیلنچ،قانونی تقاضے پورے نہیں کیتے گئے:درخاست گزار۔۔۔٭رویل نیوز٭

اسلام آباد (نمایندا رویل) کھنڈ سکینڈل انکوایری کمیٹی دی رپورٹ نُوں پاکستان شوگر ملز ایسوسی ایشن سنے 17ملز مالکان نے چیلنج کر دِتا‘ سنوائی لئی مقرر۔ تفصیلات دے مطابق پاکستان شوگر ملز ایسوسی ایشن سنے 17 ملز مالکان نے کھنڈ سکینڈل انکوایری کمیشن دی رپورٹ اسلام آباد ہائیکورٹ وچ چیلنج کر دِتی‘درخاست سنوائی لئی مقرر کر دِتی گئی اے تے اسلام آباد ہائیکورٹ دے چیف جسٹس اطہر من اللہ سنوائی کرن گے۔ درخاست چیلنج کرن والیاں وچ پاکستان تحریک انصاف (پی ٹی آئی) دے سینئر آگو جہانگیر ترین‘ سپیکر پنجاب اسمبلی چودھری پرویز الٰہی دے پُتر تے ق لیگ دے ایم این اے مونس الٰہی‘ وفاقی وزیر خسرو بختیار دے بھرا دی ملز پٹیشنرز وچ شامل نیں۔ درخاست گزاراں ولوں اپنی درخاست وچ وفاق‘ سیکرٹری داخلا تے وفاقی تحقیقاتی ادارے (ایف آئی اے) نُوں فریق بنایا گیا جد کہ وزیراعظم عمران خان دے معاون خصوصی برائے احتساب تے داخلا شہزاد اکبر‘ ڈی جی ایف آئی اے واجد ضیاء تے انکوایری کمیشن دے ارکان فریقین وچ شامل نیں۔ درخاست گزاراں نے انکوایری کمیشن دی تشکیل‘ رپورت تے کابینا توں منظوری کالعدم متھن دی بینتیکردیاں ہویاں کہیا اے کہ انکوایری کمیشن دی تشکیل غیر قانونی سی۔ درخاست گزار اں نے مؤقف اختیار کیتا کہ کمیشن نے تحقیقات کردیاں ہویاں مجوزا قانونی تقاضے پورے نہیں کیتے۔