کرونا روگیاں تے موتاں وچ مسلسل وادھا٭عالمی ادارا صحت دیاں تجویزاں اُتے عملدرآمد ضروری نہیں، لوکائی دے بہترین مفاد وچ بہترین خُد مختار فیصلے کیتے: ڈاکٹر ظفر مرزا۔۔۔٭رویل نیوز٭

لاہور‘ اسلام آباد (نمایندا رویل) پاکستان وچ کرونا دے متارین تیزی نال ودھن لگے‘ ملک وچ کرونا دے تصدیق شدا کیساں دی گنتی 1 لکھ 13 ہزار 702 تک پہنچ گئی جد کہ 1 دن وچ ہور 83 بندے چلانا کر گئے جہدے بعد مَوتاں دی گنتی 2 ہزار 255 ہو گئی۔ نیشنل کمانڈ اینڈ اپریشن سینٹر دے تازا ترین آنکڑیاں دے مطابق پچھلے 24 گھنٹیاں دے دوران 5 ہزار 385 نویں کیسز رپورٹ ہوئے‘ پنجاب وچ 43 ہزار 460‘ سندھ وچ 41 ہزار 303‘ پختونخوا وچ 14 ہزار 527‘ بلوچستان وچ 7 ہزار 31‘ گلگت بلتستان وچ 974‘ اسلام آباد وچ 5 ہزار 963 جد کہ ازاد کشمیر وچ 444 کیسز رپورٹ ہوئے۔ملک وچ ہُن تک 7 لکھ 54 ہزار 252 بندیاں دے ٹیسٹ کیتے گئے‘ پچھلے 24 گھنٹیاں دے دوران 23 ہزار 799 نویں ٹیسٹ کیتے گئے‘ ہُن تک 36 ہزار 308 روگی صحت یاب ہو چکے نیں جد کہ کئی روگیاں دی حالت ماڑی اے۔ دوجے پاسے وزیراعظم دے صحت دے اُچیچے صلاحکار ڈاکٹر ظفر مرزا نے کہیا اے کہ عالمی ادرا صحت دیاں تجویزاں اُتے عملدرآمد ضروری نہیں‘ 2 ہفتے لاک ڈاؤن‘ 2 ہفتے نرمی دی تجویز غور ہیٹھ نہیں‘ عالمی ادارا صحت نے صرف وباء نُوں ویکھنا ہوندا اے‘ اسیں اپنی لوکائی دے بہترین مفاد وچ بہترین خُد مختار فیصلے کیتے نیں تے کرونا وایرس دے معاملے اُتے سوچی سمجھی حکمت عملی اپنائی‘ پاکستان ایس وباء سنے صحت دے شعبے وچ عالمی ادارا صحت دے نال دیرینا سراکت داری نُوں اہمیت دیندا اے۔ اوہناں نے کہیا کہ ایس او پیز اُتے عمل کرنا ساڈی پہلی ترجیح اے‘ کرونا وایرس دے نال ندگی نُوں وی چلانا اے‘ کوئی پتا نہیں وایرس کنا عرصا رہندا اے‘ جہڑے سیکٹر بند نیں اوہ بند ای رہن گے‘ لوکائی نے سمجھیا کرونا عید دے بعد مُک جانا اے تے احتیاط نہیں کیتی‘ آن والے دناں وچ کرونا دے کیسز ودھدے نظر آ رہے نیں‘ لوکائی لئی جو بہتر اے اوہ فیصلا کردے آں‘ حکومت دے کول لاک ڈاؤ ن دا آپشن موجود اے۔