وایرس کارن ہلاکتاں ودھن دا دھڑُکو اے٭احتیاطی تدبیراں نہ کرن والیاں خلاف کارروائی ہوئے گی:وزیراعظم عمران خان۔۔۔٭رویل نیوز٭

اسلام آباد (نمایندا رویل) ُوزیراعظم عمران خان دا کہنا اے کہ کرونا وایرس دے کارن اگلے کجھ دن دے دوران پاکستان وچ مَوتاں ودھن گیاں جد کہ ایس او پیز دی آپ نگرانی کراں گا‘ جہڑے صوبے وچ ایس او پیز اُتے عملدرآمد نہیں ہووے گا ایکشن لواں تے تے مکمل بندکر دِتا جاوے گا۔ کرونا صورتحال اُتے خیالاں دا اظہار کردیاں ہویاں وزیراعظم دا کہنا سی کہ اللہ تعالیٰ دا شکر اے اسیں بھارت ورگا لاک ڈاؤن نہیں کیتا۔ لاک ڈاؤن دوران بھارت دے 84 فیصد گھرانیاں دی آمدن گھٹ ہوئی‘ گوانڈھی ملک وچ 3 کروڑ نوجوان لوک بیروزگار ہو گئے۔ عمران خان دا کہنا سی کہ بھارت وچ امیر طبقے نُوں لاک ڈاؤن نال فرق نہیں پیا‘ پہلے دن توں کَہ رہیا سی غریب دا سوچنا پوے گا۔ اوہناں نے کہیا کہ پاکستان و وایرس اُتے جا رہیا اے‘ میں دَسنا چاہندا آں کہ اگلے کجھ دن دے دوران پاکستان وچ کرونا وایرس کارن ہلاکتاں ودھن دا دھڑُکو اے۔ دنیا دے حالات نُوں ویکھن دے بعد سمارٹ لاک ڈاؤن نُوں ترجیح بنایا۔ وزیراعظم نے لوکائی توں اپیل کردیاں ہویاں کہیا کہ سبھ لوک ایس او پیز اُتے عمل کرن‘ جے احتیاط نہیں کراں گے تے ہسپتالاں اُتے پریشر ودھدا جاوے گا۔ نیو یارک دے ہسپتالاں وچ وی وینٹی لیٹرز دی کمی ہو گئی اے۔ جے اِک محلے وچ وایرس کھلرے گا تے اوس پورے محلے نُوں بند کر دِتا جاوے گا۔ اوہناں دا ہور کہنا سی کہ پورے ملک دے ایس او پیز دا جایزا لواں گا‘ وزیراعظم ہاؤس توں صورتحال نُوں مانیٹر کراں گا‘ میرے کول روزانا دی بنیاد اُتے رپورٹ آئے گی‘ جہڑے صوبے وچ ایس او پیز اُتے عملدرآمد نہیں ہووے گا‘ ایکشن لواں گے‘ صوبے نُوں مکمل بند کر دِتا جاوے گا۔ وزیراعظم دا کہنا سی کہ ساڈی لوکائی بڑی لا پرواہی کر رہی اے‘ خطرناک سوچ اے‘ اگلے مہینے کرونا دی صورتحال ٹیسی اُتے جا سکدی اے۔ اوہناں دا کہنا سی کہ اپوزیشن دی تنقید نال لگدا اے‘ ایہ چاہندے نیں کرونا نال بُہتیاں مَوتاں تے معیشت بَہ جاوے‘ اپوزیشن لیڈر لندن توں نَسے نَسے پاکستان آئے تے ماسک نہیں پایا ہویا سی‘ اپوزیشن لیڈر نے ایہ امید لائی کہ ہُن میں کمپیوٹر دے ساہمنے بَہ کے دَساں گا کیہ ہووے گا‘ اللہ دا شکر اے ساڈے مغرب نالوں چنگے حالات نیں۔ لوک مشکل وچ نیں پر اپوزیشن حالات توں فایدا چُکن دی کوشش کر رہی اے۔جویں جویں مَوتاں ودھ رہیاں نیں‘ کہیا جا رہیا اے حکومت دیاں پالیسیاں ٹھیک نہیں۔