بجٹ وچ لوکاں نُوں سہولتاں دینیاں نیں نویں ٹیکس نہیں لاواں گے،صنعت نوں ترقی دین ول دھیان اے: ڈاکٹر عبدالحفیظ شیخ ۔۔۔٭رویل نیوز٭

اسلام آباد (نمایندا رویل) مشیر خزانا ڈاکٹر عبدالحفیظ شیخ نے کہیا اے کہ مالی سال 2019-20 وچ جی ڈی پی دی شرح نمو دا تخمینا 0.4 فیصد اے‘ ایہدے وچ زرعی شعبے وچ ترقی دی شرح 2.67 فیصد اے‘ کرونا نال مجموعی ملکی پیداوار (جی ڈی پی) نُوں 3 ہزار ارب رُپئے دا نقصان ہویا‘ صنعت خاص طور اُتے متاثر ہوئی تے ایہدے وچ ترقی دی شرح منفی 2.64 اے تے خدمتاں دے شعبے وچ ایہ شرح منفی 3.4 فیصد اے‘ چالو سال تے پچھلے سال مجموعی طور اُتے 5 ہزار ارب رُپئے قرضیاں دی مد وچ واپس کیتے گئے‘ نویں بجٹ وچ کوئی نواں ٹیکس نہیں لگے گا‘ موجودا حکومت نُوں بحران ورثے وچ مِلیا‘ ساڈے اخراجات آمدن توں کافی ودھ سن‘ اسیں پورا سال سٹیٹ بینک آف پاکستان توں اِک ٹکا وی قرض نہیں لیا‘ اسیں ٹیکسز وچ بہت چنگی کامیابی حاصل کیتی‘ کرونا وایرس دے کھلار توں پہلے ٹیکسز وچ 17 فیصد وادھا ہویا‘ اسیں درآمدات وچ کمی کیتی تاں جے ڈالر نُوں بچائے تے درآمدات وچ کمی دی وجھا توں ٹیکس ریونیو وچ وی کمی ہوئی ورنا ٹیکسز ودھن دی رفتار ایف بی آر وچ تقریبن 27 فیصد جا رہی سی۔ جمعرات والے دن اسلام آباد وچ اقتصادی مالیس روے 2019-20 پیش کردیاں ہویاں ڈاکٹر حفیظ شیخ نے کہیا کہ موجودا حکومت نُوں بحران ورثے وچ ملیا‘ساڈے اخراجات آمدن توں کافی ودھ سن۔ اوہناں نے کہیا کہ برآمدات دی شرح صفر رہی جد کہ پچھلی حکومت دے آخری 2 سالاں وچ غیر ملکی زرمبادلا دے ذخایر 16-17 توں ڈِگ کے 9 دے نیڑے پہنچ گئے سن۔ مشیر خزانا نے کہیا کہ ڈالر سستا رکھیا گیا جہدے کارن درآمدات‘ برآمدات توں دُگنیاں ہو گئیاں تے ایہناں ساریاں شیواں دا اثر ایہ ہویا کہ ساڈے کول ڈالر ختم ہو گئے کہ اسیں اپنی معیشت نُوں چنگے انداز وچ چلا سکدے تے اوس ویلے ساڈے قرضے ودھ کے 25 ہزار ارب رُپئے ہو چکے سن جے قرض تے واجبات نُوں رلایا جاوے تے ساڈے قرضے تقریبن 30 ہزار ارب یاں 30 کھرب رُپئے بن چکے سن۔ اوہناں نے کہیا ایہ اِک ایہو جہی صورتحال سی جہدے وچ اسیں بیرونی اکاؤنٹ وچ ڈیفالٹ ول ویکھ رہے ساں‘ ساڈے اخراجات آمدن توں کافی ودھ سن۔ اوہناں نے کہیا کہ بنیادی طور اُتے اسیں اپنی حکومت وچ جہڑی شرح نمو حاصل کر رہے ساں اوہ باہر توں قرض لے کے ملک دے اندر خرچ کر رہے ساں تے ایہو جہی صورتحال وچ سبھ توں پہلی شے ایہ سی کہ اسیں ہور وسایل یعنی ڈالرز نُوں متحرک کریے‘ ایس سلسلے وچ حکومت نے کافی کوششاں کیتیاں تے کجھ ملکاں توں قرض تے مؤخر شدا ادائیگیاں اُتے تیل حاصل کیتا تے ایہد ے نال آئی ایم ایف نال 6 ارب ڈالر دا پروگرام طے کیتا۔ ڈاکٹر عبدالحفیظ شیخ نے کہیا کہ حکومت نے ٹیکسز نُوں بہتر کرن لئی ہور اقدامات کرن دا فیصلا کیتا تے سبھ توں ودھ کے اپنے ملک دی برآمدات نُوں ودھان لئی اپنے کاروباری حضرات نُوں سہولتاں دین لئی کاروباری شعبے لئی گیس‘ بجلی‘ قرضے ایہ ساریاں شیواں حکومت نے اپنی جیب توں پیسے دے کے سستیاں کیتیاں تے ورثے وچ ملن والے 20 ارب ڈالر دے کرنٹ اکاؤنٹ کسارے نُوں گھٹ کرکے اسیں 3 ارب ڈالر تک لے آئے۔ مشیر خزانا ندا کہنا سی کہ کرونا دی وجھا توں مستحکم ہوندی معیشت نُوں وی جھٹکا لگا‘ کرونا توں پہلے پاکستانی معیشت 3 فیصد دی شرح نال ودھن دیت وقع سی پر چالو مالی اسل معاشی شرح نمو 0.4 فیصد رہی۔ اوہناں نے ہور کہیا کہ چالو سال فی کس آمدنی 2 لکھ 24 ہزار دے ہدف دے اُلٹ 2 لکھ 14 ہزا ر جد کہ مہنگائی 8.5 دی بجائے 9.1 فیصد رہی۔ موجودا حالات وچ لوکائی تے کاروبار اُتے ہور بھار نہیں پا سکدے‘ ساڈی کوشش اے کہ اگلے بجٹ وچ لوکاں نُوں سہولتاں دیے تے نویں ٹیکس نہ لائے جان‘ پہلے توں عاید ٹیکساں وچ کمی کیتی جاوے گی۔