جے کمیشن نے عام بندے نُوں کھنڈ دی دستیابی دے حوالے توں کجھ نہیں کیتا فیر کیہ کیتا؟:چیف جسٹس اسلام آباد ہائیکورٹ۔۔۔٭رویل نیوز٭

اسلام آباد (نمایندا رویل) اسلام آباد ہائیکورٹ نے کھنڈ دیاں قیمتاں وچ وادھے اُتے انکوایری کمیشن دی رپورٹ دے خلاف درخاست دی سنوائی دے دوران پورے ملک وچ عام بندے لئی کھنڈ 70 رُپئے ویچن دا حکم دے دِتا۔ چیف جسٹس اسلام آباد ہائیکورٹ جسٹس اطہر من اللہ نے کھنڈ دیاں قیمتاں وچ وادھے اُتے انکوایری کمیشن دی رپورٹ دے خلاف درخاست اُتے سنوائی کیتی۔ شوگر ملز ایسوسی ایشن دے وکیل علی خان نے عدالت ساہمنے اپنے دلایل وچ کہیا کہ آئین وچ وفاق تے صوبیاں دے اختیارات دا وکھرا وکھرا ذکر موجود اے‘ فروری وچ کارروائی لئی ایڈہاک کمیٹی بنائی گئی‘ کمیٹی نے وفاقی حکومت نُوں لکھیا کہ کمیشن نُوں قانونی تحفظ فراہم کیتا جاوے ایہدے لئی کمیٹی نُوں کمیشن وچ تبدیل کر دِتا جاوے‘ جویں کمیٹی نے تجویز دِتی سی اُنج ای اوہ کمیشن بن گیا‘ انکوایری کمیشن نے شوگر ملز دے فرانزک آڈٹ لئی وفاقی حکومت نُوں لکھیا‘ کمیشن نے 324 صفحیاں دی رپورٹ وچ بہت زیادا وجھاں بیان کیتیاں نیں۔ کمیشن نے اپنے ٹی او آر توں باہر جا کے کارروائی کیتی‘ معاون خصوصی تے ہوور وزیراں راہیں ساڈا میڈیا ٹرائل کیتا جا رہیا اے۔ جسٹس اطہر من اللہ نے ریمارکس دِتے کہ کھنڈ عام بندے دی ضرورت اے حکومت نُوں وی ایس حوالے توں اقدامات چُکنے چاہیدے نیں‘ سادا جہی گل اے کہ عام بندا دا بنیادی حق اے 30 فیصد کھنڈ عام بندے لئی ہوندی اے‘ جہڑے مقصد لئی کمیشن بنیا سی اوہ ایڈریس ای نہیں ہویا‘ کمیشن نوں عام بندے نُوں کھنڈ دی سہولت فراہمی لئی کجھ کرنا سی پر نہیں کیتا‘ حکومت یوٹیلیٹی سٹوراں اُتے وی سبسیڈیائز کھنڈ 80 رُپئے کلو ویچ رہی اے‘ یاتھے مفاد عاما دا سوال ساہمنے آیا اے پر ایہ سوال کسے نے چُکیا ای نہیں۔ جے کمیشن نے عام بندے نُوں کھنڈ دی دستیابی دے حوالے توں کجھ نہیں کیتا فیر کیہ کیتا؟۔ چیف جسٹس اسلام آباد ہائیکورٹ دے پُچھن اُتے مخدوم علی خان نے دَسیا کہ نومبر 2018 وچ کھنڈ دی قیمت 53 رپئے فی کلو سی‘ جہدے اُتے جسٹس اطہر من اللہ نے ریمارکس دِتے کہ 2س ال وچ کھنڈ دی قیمت 53 توں 85 رُپئے فی کلو ہو گئی‘ عام بندے نُوں بنیادی حقوق کیوں نہیں دے رہے؟۔ چیف جسٹس اطہر من اللہ نے مخدوم علی خان نال مکالمے دوران پُچھیا کہ ایہ عدات عمومی طور اُتے ایگزیکٹو دے معاملات وچ مداخلت نہیں کردی‘ اسیں حکومت نُوں نوٹس کر کے پُچھ لیندے آں پر تُسیں اوس ویلے تک 70 رُپئے کلو کھنڈ ویچو‘ تہانوں شرط منظور اے تے اسیں اگلی سنوائی تک حکومت نُوں کارروائی توں روک دیندے آں۔ ایس توں بعد اسلام آباد ہائیکورٹ نے اگلی سنوائی تک پورے ملک وچ عام بندے لئی کھنڈ 70 رُپئے کلو ویچن دا حکم دیندیاں ہویاں شوگر ملز ایسوسی ایشن دے حق وچ مشروط حکم امتناع جاری کر دِتا۔ اسلام آباد ہائیکورٹ نے رجسٹرار آفس نُوں کیس 10 دن دے بعد سنوائی لئی مقرر کرن دی ہدایت دیندیاں ہویاں سیکرٹری کابینا‘ ڈویژن‘ سیکرٹری داخلا‘ وزیراعظم دے معاون خصوصی مرزا شہزاد اکبر‘ ڈی جی ایف آئی اے‘ ڈی جی اینٹی کرپشن پنجاب‘ سیکرٹری داخلا‘ وزیراعظم دے معاون خصوصی مرزا شہزاد اکبر‘ ڈی جی ایف آئی اے‘ ڈی جی اینٹی کرپشن پنجاب‘ ڈپٹی ڈائریکٹر آئی بی‘ ایس ای سی پی‘ سٹیٹ بینک تے ایف بی آر دے ڈی جی انویسٹی گیشن اینڈ انٹیلی جنس نُوں نوٹس جاری کر دِتے۔