وفاقی حکومت ولوں 2020-21 بجٹ پیش:وزیراعظم عمران خان دی صدارت ہیٹھ وفاقی کابینا دا اجلاس،7600 ارب رُپئے دا بجٹ دی منظور۔۔۔٭رویل نیوز٭

اسلام آباد (نمایندا رویل) وفاقی حکومت نے اگلے مالی سال 2020-21 لئی تنخاہواں تے پنشن وچ وادھے دے بغیر 7294.9 ارب رُپئے حجم دا وفاقی بجٹ پیش کر دِتا جہدے وچ لوکائی نُوں ریلیف پہنچان لئی کوئی نواں ٹیکس نہیں لایا گیا‘ سرکاری ملازماں دیاں تنخاہواں تے پنشنز وچ وادھا نہ کرن دا فیصلا‘ کئی الاؤنسز وچ وادھا کیتا جاوے گا‘ ریٹائرڈ سرکاری ملازماں نُوں وی پہلے والی ای پنشن ملے گی۔ سپیکر اسد قیصر دی صدارت ہیٹھ قومی اسمبلی دا اجلاس ہویا جہدے وچ وفاقی وزیر برائے اقتصادی امور حماد اظہر نے بجٹ پیش کیتا۔ وفاقی بجٹ وچ آٹو رکشا‘ موٹر سائیکل رکشا ے 200 سی سی تک دیاں موٹر سائیکلاں اُتے ایڈوانس ٹیکس ختم جد کہ ڈبل کیبن گڈیاں اُتے ٹیکس دی شرح ودھا دِتی گئی اے۔ ڈبل کیبن گڈ یاں‘ ای سگریٹ تے درآمدی مشینری اُتے ٹیکس دی شرح ودھان تے مقامی سطح اُتے تیار کردا موبائل فون اُتے ٹیکس گھٹ کرن دی تجویز دِتی گئی اے۔ سگار تے سگریٹ دی پرچون قیمت اُتے فیڈرل ایکسائز ڈیوٹی دی شرح 65 فیصد توں ودھا کے 100 فیصد کرن جد کہ کیفینیٹڈ انرجی ڈرکس اُتے 25 فیصد فیڈرل ایکسائز ڈیوٹی عاید کرن دی تجویز اے۔ حکومت نے بجٹ وچ بھاری فیساں لین والے تعلیمی اداریاں اُتے 100 فیصد توں ودھ ٹیکس لا دِتا اے۔ 2 لکھ رُپئے توں ودھ سالانا فیس لین والے تعلیمی اداریاں نُوں 100 فیصد وادھو ٹیکس دینا پوے گا۔ تاجراں لئی شناختی کارد دے بغیر ویچ وٹک کرن دی حد 50 ہزار توں ودھا کے 1 لکھ رُپئے کر دِتی گئی اے۔ بجٹ وچ وفاقی ریونیو دا تخمینا 3700 ارب رُپئے اے تے اخراجات 7137 ارب رُپئے نیں‘ ایس طرحاں بجٹ کسارا 3437 ارب رپئے اے جہڑا جی ڈی پی دا 7 فیصد بندا اے۔ بجٹ وچ ایف بی آر دیاں ٹیکس وصولیاں دا ہدف 4963 ارب رُپئے تجویز کیتا گیا اے جد کہ دفاعی بجٹ دا حجم 1289.134 ارب رُپئے رکھیا گیا اے۔ لوکائی نُوں سستی ٹرانسپورٹ فراہم کرن لئی پاکستان ریلوے لئی 40 ارب رُپئے‘ تعلیم لئی 30 ارب رُپئے‘ صحت دے شعبے لئی 20 ارب‘ توانائی تے بجلی لئی 80 ارب‘ خوراک تے زراعت لئی 12 ارب‘ موسمیاتی تبدیلی لئی 6 ارب رُپئے‘ سائنس و ٹیکنالوجی لئی 20 ارب رُپئے تے قومی شاہراہواں لئی 118 ارب رُپئے رکھے گئے نیں۔ ٹڈی دل دے خاتمے لئی 10 ارب رُپئے‘ کامیاب نوجوان پروگرام لئی 2 ارب رُپئے جد کہ فنکاراں دی مالی امداد 25 کروڑ توں ودھا کے 1 ارب رُپئے مختص کیتے گئے نیں۔ اگلے جٹ وچ این ایف سی ایوارڈ اُتے نظرثانی دا فیصلا کیتا گیا اے‘ مجموعی ریونیو دا تخمینا 6573 ارب رُپئے اے جہدے وچ ایف بی آر دے ریونیو دا 4963 ارب رُپئے اے تے نان ٹیکس ریونیو 1610 ارب رُپئے اے‘ جد کہ وفاقی ٹیکساں وچ صوبیاں دا حصا 2873.7 ارب رُپئے اے۔ کرونا وایرس دے تدارک لئی 1200 ارب رُپئے توں ودھ دے پیکج دی منظوری دِتی گئی اے‘ طبی آلات دی خریداری لئی 71 ارب رُپئے تے غریب خانداناں لئی 150 ارب مختص کیتے گئے نیں۔ اگلیمالی سال لئی وفاقی ترقیاتی بجٹ وچ پچھلے سال دی نسبت 51 ارب رُپئے دی کمی کیتی جا رہی اے۔ مجموعی وفاقی ترقیاتی بجٹ دا حجم 1324 ارب رُپئے ہووے گا‘ وفاقی وزارتاں تے ڈویژناں لئی 650 ارب رُپئے رکھن دی تجویز جد کہ صوبیاں لئی 674 ارب رکھن دی تجویز اے۔ ہوٹل دی صنعت اُتے 6 مہینیاں لئی ٹیکس دی شرح ڈیڈھ فیصد توں گھٹ کر کے 0.5 فیصد کرن دی تجویز دِتی گئی اے۔ بجٹ تجویزاں وچ ایمرجنسی فنڈ لئی 100 ارب رُپئے رکھے گئے نیں۔ ازاد جموں کشمیر لئی 55 ارب‘ گلگت بلتستان لئی 32 ارب‘ خیبر پختونخوا وچ ضم ضلعیاں لئی 56 ارب‘ سندھ لئی 19 ارب‘ بلوچستان لئی 10 ارب دی خصوصی گرانٹ رکھی گئی اے۔ بجٹ اجلاس دوران اپوزیشن نے سخت احتجاج کیتا تے کھنڈ چور دے نعرے وی لائے۔ ایس توں پہلاں وفاقی کابینا نے اگلے مالی سال دے بجٹ دی منظوری دِتی تے موجودا حالات دے تناظر وچ تنخاہواں تے پنشن وچ وادھا نہ کرن دا فیصلا کیتا‘ وزیراعظم عمران خان دی صدارت ہیٹھ وفاقی کابینا دا اجلاس ہویا جہدے وچ اگلے مالی سال لئی 7600 ارب رُپئے حجم دے بجٹ دی منظوری دے دِتی گئی۔ سرکاری ملازماں دیاں تنخاہواں تے ریٹائرڈ ملازماں دی پنشن پچھلے سال والی ای برقرار رہوے گی۔ کئی کابینا ارکان نے تنخاہواں تے پنشن وچ وادھے دا مطالبا کیتا پر وزارت خزانا نے انکار کردیاں ہویاں کہیا کہ موجودا معاشی صورتحال وچ ایہ وادھا ممکن نہیں۔