kraamaat@gmail.com
+ +92 333-430-6384


پنجاب سرکار نے دو ورھیاں وچ لوکائی نُوں سہولتاں اپڑان لئی ریکارڈ قانون سازی کیتی ٭پچھلے حکمراناں نے صرف ذاتی فایدے کیتے:عثمان بزدار۔۔۔٭رویل نیوز٭


نمائندا رویل June 13, 2020


لاہور (نمایندا رویل) وزیر اعلا پنجاب نال وزیر قانون بشارت راجا نے ملاقات کیتی جہدے وچ پنجاب اسمبلی دے بجٹ سیشن تے اراکین نُوں کرونا توں بچان لئی حفاظتی اقدامات اُتے گلبات کیتی گئی۔ ایس موقع اُتے وزیر اعلا پنجاب دا کہنا سی اراکین اسمبلی دے تحفظ لئی بجٹ سیشن اسمبلی دی بجائے مقامی ہوٹل وچ ہو رہیا اے‘ کرونا دی وباء نے ہر طبقے نوں متاثر کیتا اے‘ بجٹ وچ کمزور طبقے دے تحفظ لئی اقدامات تجویز کیتے جان گے‘ عام بندے نُوں ریلیف دین لئی جامع منصوبا بندی کر لئی گئی اے‘ اگلے مالی سال دے بجٹ وچ ہر طبقے دا خیال رکھیا جاوے گا‘ کرونا دی وجھا توں سرکاری محاصل دی وصولی وچ کمی ہوئی۔ وزیر اعلا پنجاب سردار عثمان بزدار نے سرکاری ملازماں دیاں تنخاہواں وچ کٹوتی دی تجویز نُوں رَد کر دِتا۔ اوہناں نے کہیا کہ سرکاری ملازمین نُوں ریلیف دین دے حق وچ آں جد کہ عام بندے دیاں معاشی اوکڑاں دا ازالا ساڈی پہلی ترجیح اے‘ مشکل ترین حالات وچ وی لوکائی نُوں ریلیف دین والا بجٹ پیش کراں گے‘ غیر ضروری اخراجات گھٹ کراں گے‘ پنجاب سرکار نے 2 ورھیاں دے دوران لوکائی نُوں سہولتاں پہنچان لئی ریکارڈ قانون سازی کیتی اے‘ پنجاب اسمبلی دا قانون سازی دے حوالے توں ریکارڈ ہور صوبیاں دیاں اسمبلیاں دے مقابلے وچ سبھ توں چنگا اے‘ ہر لمحے لوکائی دی خدمت لئی وقف اے۔ وزیر اعلا پنجاب نے ہور کہیا ساڈا ایجنڈا صرف تے صرف لوکائی دی خدمت اے‘ پچھلے حکمراناں نے صرف ذاتی مفادات دا تحفظ کیتا‘ تحریک انصاف دی حکومت معاشرے دے ہر طبقے دیاں زندگیاں وچ اسانیاں پیدا کر رہی اے‘ لوکائی دی خدمت دا مشن پورا کراں گے‘ لوکائی کھوکھلے نعرے نہیں‘ عملی اقدامات چاہندی اے‘ اپوزیشن دے کول فلاح عاما دا ایجنڈ اے نہ کرونا نال نبڑن دا‘ ماضی وانگوں ہُن صوبے وچ ذاتی پسند و نا پسند نہیں سگوں میرٹ تے گورننس دی حکمرانی اے۔ عثمان بزدار نے کہیا کہ ساڈی نیت نیک تے سمت درست اے‘ اپوزیشن صرف نان ایشوز اُتے سیاست کر رہی اے‘ تنقید دی پروا کیتے بغیر لوکائی دی خدمت دے سفر نُوں ہور تیزی نال اگے ودھاواں گے۔