حکومتی نا اہلی دی سزا قوم تے ملک نُوں مل رہی اے، وفاقی بجٹ  لوکائی دشمن اے: شہباز شریف۔۔۔٭رویل نیوز٭

لاہور (نمایندا رویل) مسلم لیگ (ن) دے صدر شہباز شریف نے کہیا اے کہ موجودا حکومت دے بجٹ نال ملک دے باقی بچے ساہ وی رُک جان گے۔ مسلم لیگ ن دے صدر تے پارلیمنٹ وچ قائد حزب اختلاف شہباز شریف نے وفاقی بجٹ نُوں لوکائی دشمن متھدیاں ہویاں کہیا کہ بجٹ تے ایہدے اہداف غیر حقیقی نیں‘ غریب کش بجٹ دے نتیجے وچ مہنگائی تے بیروزگاری وچ وادھا ہووے گا‘ ایہ بجٹ صرف پی ٹی آئی دے فنانسرز تے مفاد پرستاں نُوں نوازن لئی بنایا گیا اے‘ جہدے نال ملک دے رہے سہے معاشی ساہ وی رُک جان گے‘ ایہ بجٹ نہیں تباہی دا نسخا اے‘ آئی ایم ایف دے دباء اُتے تنخاہواں تے پنشن وچ وادھا نہ کرنا ظلم اے۔ شہباز شریف دا کہنا سی کہ میرے دھڑکو حرف بہ حرف سچ ثابت ہوئے‘ بجٹ اعلاناں نال ثابت ہویا کہ حکومت اصلاح احوال تے دانشمندی دی راہ اپناو ن نُوں تیار نہیں‘ حکومتی نا اہلی دی سزا قوم تے ملک نُوں مل رہی اے۔ حکومت اپنی نالایقی پہلے مسلم لیگ (ن) تے ہُن کرونا دے پچھے لُکاون دی کوشش کر رہی اے‘ پر انج کم نہیں چلے گا‘ وباء توں پہلے معاشی بربادی حکومتی ناکامیاں تے بے سمت پالیسیاں دا کافی ثبوت اے‘ فروری توں پہلے اوہناں دی معاشی کمکاری اپنے اہداف توں 25 فیصد توں ودھ گھٹ سی‘ مہنگائی‘ بیروزگاری‘ کاروباری بدحالی نے تواریخی ریکارڈ قایم کر دِتے نیں‘ 68 سال وچ پہلی وار ملکی جی ڈی پی منفی ہو چکی اے۔