سوا لکھ کرونا روگی٭ڈھائی ہزار موتاں،متاثرین دی تعداد وچ تیزی نال وادھا ہو رہیا اے، ڈریپ نے کرونا وایرس ٹیسٹنگ کٹ دی منطوری  دے دتی۔۔۔٭رویل نیوز٭

اسلام آباد (نمایندا رویل) ملک وچ کرونا دے متاثرین تیزی نال ودھن لگے‘ ملک وچ کرونا دے تصدیق شدا کیسز دی گنتی 1 لکھ 25 ہزار 933 ہو گئی‘ پچھلے 24 گھنٹیاں وچ ملک وچ کرونا نال ہور 107 مَوتاں ہوئیاں جہدے بعد مَوتاں 2 ہزار 463 ہو گئیاں۔ نیشنل کمانڈ اینڈ اپریشن سینٹر دے تازا ترین آنکڑیاں دے مطابق پچھلے 24 گھنٹیاں دے دوران 6 ہزار 397 نویں کیسز رپورٹ ہوئے‘ پنجاب وچ 47 ہزار 382‘ سندھ وچ 46 ہزار 828‘ خیبر پختونخوا وچ 15 ہزار 787‘ بلوچستان وچ 7 ہزار 673 رپورٹ ہوئے۔ پچھلے 24 گھنٹیاں دوران 28 ہزار 344 نویں ٹیسٹ کیتے گئے‘ ہُن تک 40 ہزار 247 روگی صحت یاب ہو چکے نیں جد کہ کئی روگیاں دی حالت ماڑی اے۔ دوجے پاسے وزارت سائنس اینڈ ٹیکنالوجی نے اِک ہور اہم میل پتھر حاصل کر لیا۔ ڈریپ نے پاکستان وچ کرونا وایرس ٹیسٹنگ کٹ دی منطوری دے دِتی اے۔ وفاقی وزیر سائنس اینڈ ٹیکنالوجی فواد چودھری نے سماجی رابطے دی ویب سائٹ اُتے ٹویٹ کردیاں ہویاں کہیا نسٹ تے ساڈے ماہرین نُوں مبارکباد پیش کردا آں‘ تُسیں ساڈا سر فخر نال اُچا کر دِتا‘ کرونا وایر س ٹیسٹنگ کِٹاں پاکستان وچ بنن نال کرونا ٹیسٹ دی لاگت وچ نمایاں کمی واقع ہووے گی‘ مقامی طور اُتے کِٹاں تیار کرن نال درآمدی بل وچ نمایاں کمی واقع ہووے گی۔