غزل/ارشاد سندھو

رنگاں تے شک پیندا اے تصویراں دا نہیں رَولا سی
سُفنے ای کُجھ کاہلے سن تعبیراں دا نہیں رولا سی

جِنے مرضی رَولے ہوون اِک دوجے توں نِکھڑن دے
ایہ تے اوہ وی مندا اے تقدیراں دا نہیں رَولا سی

وکھری گل اے ویلے نے نہیں مُکن دتا حالانکہ
میرا اوہدا رولا کوئی جاگیراں دا نہیں رَولا سی

کن پڑوانا وی تے موت سی میرے دھرت قبیلےدی
ہیراں تے سن لکھاں مینوں ہیراں دا نہیں رَولا سی

تیرے رُسن مگروں دِل دے شیشے نوں کئی خطرے سن
اکھ توں پُچھ لئے اکھ نوں اکھ دے نیراں دا نہیں رَولا سی

جِنا وی سی جہجا وی سی میل ملاپ سی روحاں دا
ساڈی پیار کہانی وچ سریراں دا نہیں رولا سی

جنڈ جنھاں دے ساہویں سندھو خورے کیہ کیہ مسئلے سن
خالی کچیاں گھڑیاں، ٹُٹیاں تیراں دا نہیں رَولا سی

٭٭٭٭٭