٭لعنت٭

*لعنت *

احمد نعیم ارشد

ل ع ن ت چار حرفاں دا ملاپ ہووے تے لفظ لعنت دا جنم ہُوندا اے ایسے لئی کسے تے چار حرف بھیجے جاندے نیں سُنیا اے سب توں پہلاں چار حرفاں دا نوبل پرائز ابلیس دے حصے وچ آیا سی اوس توں بعد چل سو چل۔

موجودادرو وِچ لعنتاں دی گنتی دا حساب لایا جائے تے اکدوجے تے لعنتاں پان دی سبھ توں وڈی گنتی پاکستان وچ اے بہت سارے لوک لعنت دا متبادل دُر فِٹے مونہ ورت رہے نیں سگوں کچھ بریک لوک تے در فِٹے مونہ نُوں "درررررررررررررر فِٹے مونہ وی آکھ لیندے نیں بریک لوکاں توں یاد آیا پاکستان یاں ساری دُنیا وِچ اجہے لوک وی ہُندے نیں جہڑے حدوں ودھ بریک ہُندے ایتھے تُسیں پرویز خٹک ورگے بریک نہ سمجھ لینا بلکہ ذہنی طور تے بریک یعنی حساس اور حساس وی ایہو جہے جہڑے ہر انسان نوں صرف اپنے ورگا انسان ہی سمجھدے نیں تے جدوں انسانیت دی گل کردے نیں تے لعنتاں دا اک طوفان اونہاں ول نوں مونہ کر لیندا اے پاکستان وچ وچاری لعنت آپ کنفیوز رہندی اے شٹل کاک وانگ ایہدے پچھواڑے تے سَٹاں وجدیاں رہندیاں نے تے ایہ اک مونہ توں دوجے مونہ ول سفر جاری رکھدی اے

جویں مثال اے کہ کسے نے چن دے مونہ تے تُھکیا چن دا تے کُجھ نہیں وگڑیا البتا تُھک واپس تُھکن والے دے مونہ تے آ پیا ایویں کئی واری لعنت چن ول نُوں تُھکے ہوئے تُھک وانگ واپس اپنے ہی مونہ تے پے جاندی اے مثالاں تہاڈے ساہمنے موجود نیں کیوں جے ایہ سکرین شارٹ تے فوٹیج دا دور اے

کیہ خیال اے۔۔۔۔۔۔۔۔۔؟