پنجاب سرکار دا بجٹ:ریلیف پیکج دین دی وی تجویز،ٹیکس فری بجٹ ہووے گا۔۔۔٭رویل نیوز٭

لاہور (نمایندا رویل) پنجاب سرکار مالی سال 2020-21 دا بجٹ اج پیر نُوں پنجاب اسمبلی و چ پیش کرے گی‘ سرکاری ملازماں دیاں تنخاہواں تے پنشن وچ کوئی وادھا نہیں ہووے گا‘ صوبائی بجٹ دا حجم 2220 ارب رُپئے توں ودھ رکھن دی تجویز کیتی گئی اے جد کہ جاری اخراجات لئی 1780 ارب رُپئے مختص کیتے جان دا امکان اے۔ پنجاب دا بجٹ ٹیکس فری بجٹ ہووے گا‘ بجٹ وچ سالانا ترقیاتی پروگرام دا حجم 337 ارب تے زرعی انکم ٹیکس وچ وادھے دی تجویز کیتی گئی اے‘ بجٹ دی تیاری وچ شعبا صحت تے تعلیم ترجیحات وچ شامل نیں۔ پرائمری ہیلتھ لئی 125 ارب دین تے سپیشلائزڈ ہیلتھ نُوں 7 فیصد وادھے نال 130 ارب دین دی تجویز اے۔ ایسے طرحاں سکول ایجوکیشن لئی 323 ارب مختص کرن‘ پولیس نُوں 17 فیصد وادھے نال 132 ارب دین تے کرونا دے خلاف خدمتاں اُتے ہیلتھ پروفیشنلز لئی 10 ارب الاؤنس دی تجویز کیتی گئی اے۔ پنجاب وچ سرکاری ملازماں دیاں تنخاہواں تے پنشن وچ وادھا نہ کرن‘ ہیلتھ پروفیشنلز دیاں 8519 اسامیاں اُتے بھرتیاں جد کہ چھوٹ تے درمیانے درجے دے کاروبار لئی 30 ارب دی تجویز پیش کیتی گئی اے۔ پنجاب بجٹ وچ 15 ارب دا ٹیکس ریلیف پیکج دین دی وی تجویز کیتی گئی اے۔ بجٹ ابتدائی منظوری لئی کابینا اجلاس وچ پیش کیتا جاوے گا‘ کابینا اجلاس دی منظوری بعد بجٹ اسمبلی وچ پیش ہووے گا۔