پنجاب دیاں جامعات وچ قرآن مجید  ترجمے دے نال پڑھے بغیر ڈگری نہیں ملنی،نوٹیفکیشن جاری...٭رویل نیوز٭

لاہور (نمایندا رویل) پورے پنجاب دیاں یونیورسٹیاں وچ قرآن پاک ترجمے دے نال پڑھن نُوں لازمی متھن دا نوٹیفکیشن جاری‘ پنجاب دیاں جامعات وچ قرآن مجید نُوں ترجمے دے نال پڑھے بغیر ڈگری نہیں ملے گی۔ تفصیلات دے مطابق گورنر پنجاب و یونیورسٹیز دے چانسلر چودھری محمد سرور نے ساریاں یونیورسٹیاں دے وائس چانسلرز دی مشاورت دے نال قرآن پاک ترجمے دے نال یونیورسٹیز وچ پڑھان دا اعلان کیتا‘ جہدے بعد ہُن باقاعدا نوٹیفکیشن وی جاری کر دِتا اے‘ جہدے وچ کہیا گیا اے کہ پنجاب دیاں جامعات وچ قرآن مجید نُوں ترجمے دے نال پڑھے بغیر ڈگری نہیں ملے گی۔ پنجاب دیاں ساریاں جامعات وچ لیکچررز پڑھیاراں نُوں ترجمے دے نال قرآن پڑھان گے تے پڑھیاراں لئی ایس لیکچر وچ رلت کرنا اونا ای لازمی ہووے گا جنا ہور لیکچراں وچ ہوندا اے۔ یونیورسٹیز وچ قرآن جید دا نصاب اسلامیات دے مضمون دے علاوا پڑھایا جاوے گا۔ گورنر چودھری محمد سرور نے ایس بارے وچ ہور کہیا اے کہ قرآن مجید ساڈے لئی اصل رہنمائی دا وسیلا اے‘ قرآن پاک دیاں تعلیمات اُتے عمل کر کے ای دنیا تے آخرت سنواری جا سکدی اے۔ اوہناں نے کہیا کہ قرآن پاک مکمل ضابطا حیات اے جہڑا دنیا دی رہنمائی لئی ساڈے نبی ؐ اُتے نازل ہویا‘ اسیں پنجاب دیاں ساریاں جامعات وچ قرآن پاک نُوں معنی دے نال پڑھیاراں نُوں پڑھاواں گے تاں جے اوہ ایہدے توں رہنمائی لے کے اِک چنگا انسان بن سکن۔ گورنر نے کہیا کہ اسیں پنجاب یونیورسٹی دے وائس چانسلر پروفیسر ڈاکٹر نیاز اختر دی اگوائی وچ 7 کنی کمیٹی بنا دِتی اے جہناں نے ساریاں یونیورسٹیاں دے وائس چانسلرز دے نال مکمل مشاورت د ے بعد سارے امور نُوں فائنل کیتا جہدے بعد اج الحمداللہ ایہدا باقاعدا نوٹیفکیشن وی جاری کر دِتا اے۔ گورنر پنجاب نے کہیا کہ چنگا ڈاکٹر‘ انجینئر‘ سائنسدان یاں چنگا عالم بنن لئی چنگا انسان بننا ضروری اے تے چنگا انسان اوس ویلے بن سکدا اے جدوں چنگیاں گلاں سکھیاں جان۔ اوہناں نے کہیا کہ انشاء اللہ ہُن یونیورسٹیاں وچ ساڈے نوجوان قرآن پاک ترجمے نال پڑھن توں بھرویں رہنمائی حاصل کر کے اِک چنگے انسان بن سکن گے۔