kraamaat@gmail.com
+ +92 333-430-6384


پاکستان تے صنفی شناخت


الیاس عباسی June 17, 2020



پاکستان تے صنفی شناخت

الیاس عباسی

جے ایہ کہیاجاوے کہ ترقی اجوکے دوردامعجز ا اےتے غلط نہیں ہووے گا مشرق توں لے کے مغرب تیکر، انسان اپنے شعور تے عقل پاروں اسماناں نوں وی تسخیرکری جارہیااے تے سانجھ راہیں ایس توں فائداساری انسانیت چُک رہی اے ۔چوتھے وڈی صنعتی انقلاب نے لوکائی دی سوچ وی بدل دتی اے تے اج دا انسان اگے ودھن لئی رل مِل کے جتن کررہیا اے جہدے وچ کامیابی ایہداانتظارکررہی اے سبھ انسان بھاویں اوہ مسلمان ہوون یاں ہندوہوون یا ں مسیحی عقیدارکھدے ہوون یا سٹارآف ڈیوڈ دے منن والے ہوون سبھ مل کے انسان دی ہوند نوں بچان لئی جُتے ہوئے نیں اجہی ایکتاانسانیت لئی اک سوہنی تے روشن مثال اے شاید تواریخ وچ اجہیاپہلی واری ہورہیااے یاں فیررب سوہنے ولوں موقعا ملیا اے کہ اسیں رل مل کے بغیرکسے ونڈتوں اگے ول ودھیے۔

جہدوں اسیں مشرق تے مغرب دے سماج ول جھات پائیے تاں اک ہور کھیتروچ وی سانجھ نظرآوندی اے اوہ اے صنفی شناخت تے جنسی رُجحان رکھن والیاں دے حقاں دی, ایہناں تے ظلم تے ایہناں نوں دبان دی نہ صرف انفرادی سگوں قومی کھیتر تے وی کوشش ہوندی اے کسے دیس وچ تاں ایہناں نوں تے زندارہن داحق وی کھوہ لِتاجاوندااے تے کتھے ظلماں دی انتہاکردتی جاندی اے جہنوں ویکھ کے شاید ہِٹلرورگافاشسٹ وی شرماجائے

اج دی لوکائی صنفی شناخت تے جنسی رُجحان رکھن والیاں دے حقاں توں ڈردی کیوں اے ایہ کتھوں دوجے سیارے توں تے نہیں آئے ، ایہ وی کسے دے جائے نیں ، ایہناں دیاں وی سدھراں نیں ، ساڈے وانگوں سماج داحصا نیں ایہناں نال مغرب اندر وی ورتارا کوئی مثالی نہیں کسے حد تیکر قانون سازی ہوجاندی اے اوتھے وی اوہناں تے جسمانی تے ذہنی تشدد ہوندااے کیہ اے دہشت گردی نہیں ؟

ایس ات گردی نوں کون روکے گا ایہدے بارے گل کرنا کوئی جرم کویں بن جاندااے ساڈے ورگے ملکاں وچ تے صورتحال ہورخراب اے اج سڑکاں تے ، فٹ پاتھاں تے مین سڑک دے اشاریاں تے بھُکھ توں مجبورہوئے ،انسان، جدوں منگدے نیں تے ساڈی منافقت تے اک وڈی چپیڑ اے کیوں جے اسیں تے ایہناں نوں اپنے سماج توں باہرکڈھ چھڈیااے۔ سرکار ایہناں نوں پچھان داحق دیوے کُجھ ورھے پہلاں سپریم کورٹ ولوں شناختی کارڈ جاری کرن داحکم ملیاتاں کُجھ ہِل جُل ہوئی اندازا کرسکدے او کے کہنے کُو ماڑے حالات ہوون گئے اج کئی ،،وڈے،، ایہناں بارے گل کرن یاں ایہناں دے انسانی حقوق بارے گل کرن توں جھک دے نیں۔

اج ساڈے ملک وچ جہناں جنسی استحصال ہورہیا اے او کسے توں ڈھکواں نہیں شاید ایس پاسے دھیان ایس لئی وی نہیں جاندا کہ ایہ ظلم ہن ،سماج لئی نارم، بن چکیا اے تے اجہی صورتحال دامطلب اے کے ساڈے ضمیر مُردا ہو چکے نیں ظلم تے چپ رہن دامطلب اے کہ اسیں وی ظالم آں تے ظلم وچ اپنی خموشی راہیں حصا پا رہے آں ہم جنس پسنداں بارے ریمارکس اینے سخت ہوندے نیں کہ لِکھدیاں وی شرم نال دھون نیویں ہوجاندی اے۔

کجھ دن پہلاں صنفی اقلیت توں تعلق رکھن والی عورت دے فیس بک پروفائل توں تے ویڈیووائرل ہورہی اے جہدے وچ اک سوانی نال ایکٹی وسٹ ترس کھاندیاں شئیر کری جاندے نیں اوہناں ساڈے سماج داپوسٹ مارٹم کیتا تے ساڈی منافقت بارے گل کیتی تے نال دسیاوی اے کہ شاید ہُن اوہ زندا وی نہ رہ سکن کیوں جے اسیں تے سچ توں ڈردے آں ایسے لئی تے پنجابی دے شاعر بُلھے نوں وی کہنا پے گیا سی

سچ آکھیا بھانبڑ مچ دا اے

جھوٹھ آکھاں تے کجھ بچ دا اے

ایس بھانبڑ نوں چنگا مندن آکھن توں بہتر اے کہ اسیں انساناں نال پیار کریے تے اوہناں نوں اپنے سماج وچ عزت نال جِین داموقع دیئے ۔کئی واری تے انج جاپدااے کہ اسیں ترقی کردے تے بہت اگے آگئے آں پر انسانیت کتھے پچھے بھُل آئے آں ماضی دے لوک تے فیر ویبتھیرے چنگےسن ۔جدوں ایہناں نوں سرکاردرباراں وچ عزت دتی جاندی سی جہدی تریخ وی جانکاری دیندی اے اج ایس وچھوڑے تے سماجی تفریق دازمادار کون اے ساڈی ریت وچ تے پیارسی نفرت داتے کتھے وی وکھالانہیں ہوندارہیا سگوں جدوں دنیا انھیرے وچ سی اوہدوں ایتھے برابری نال اگے ودھیا جارہیاسی۔

ہن ویلے دی لوڑ اے کہ ایہناں بارے ،ٹیبو، بھیڑے لفظاں راہیں نفرت ناں ونڈی جاوے تے سرکارقانون راہیں ایس طبقے لئی جتن کرے تے پاکستان دی ترقی لئی اسیں سارے رل مِل کے کم کریے۔

پنجاب دی دھرتی دی رِیت سیکولر رہی اے ایسے لئی ایتھے پیار، محبت دے قصے مل دے نیں کئی وڈے صوفی شاعراں وی سماجی رویے بدلن وچ اپنا حصا پایا تے اپنی یاری پاروں اج تواریخ دا حصا نیں سگوں کئی کرداراں دے عاشق نالوں محبوب نوں لوکائی یاد رکھیاہویا اے کئی دوجے ملکاں وانگوں ایتھے وی ہم جنس پسندی نوں مندا سمجھیاجاندااے تے سماج وچ ہم جنس رُجحان رکھن والے مرد یاں عورت نوں سبھ توں بھیڑا تے منداآکھیاجاندا اے ۔کئی لوکی تاں ایس گل تے یقین رکھدے نیں کہ اج ساڈے سماج وچ جِنیاں برائیاں نیں اوہناں داکارن ہم جنس پسندی اے زلزلے آون ، سیلاب آوے یاں فیر کوئی وباآجاوے تاں ساراالزام ایسے کمیونٹی داسمجھیاجاندا اے آپے اندازا لالؤ کہ فیر اجہے سماج دا کیہ ورتاراہونا چاہیدا اے؟

جے تواریخ نوں پڑھیے تاں کئی وڈے ناں ایس بارے لکھ وی چکے نیں تے ساڈی برصغیر دی مسلم تواریخ وچ نمایاں ناں وی گزرچکے نیں جہناں اپنے کم تے ہُن پاروں اپنا ناں کمایا۔ ترقی دا راز اگے ودھن وچ اے نہ کہ اسیں پِچھے ول ٹُردے ٹُردے اوتھے جا کھلویے جتھوں سفر شروع کیتا سی۔

٭٭٭٭٭