پنجاب مخالف بجٹ منظور نا منظور نا منظور

جویں کہ اسیں سبھ جاندے ہاں کہ جون دے مہینے بجٹ پیش کیتا جاندا اے جہدے وچ حکومت لوکائی نوں خش کرن لئی وفاقی تے صوبائی حکومتاں دے ملازماں دیاں تنخاہواں وچ ملکی خزانے وچ بجٹ دے حساب نال وادھے کردی اے۔ ایس توں پہلاں کہ جون دا مہینا آوے تے حکومت ولوں بجٹ پیش ہووے وفاقی تے صوبائی اداریاں دے ملازماں وچ ایہدے اتے کئی مہینے پہلے بحث شروع ہو جاندی اے تے دفتراں دے اوقات کار دا ادھا حصا ایسے بحث وچ لنگھ جاندا اے۔جہدے وچ سیاسی پہلو دے لحاظ نال ون سونے تبصرے وی ہوندے نیں تے کئی وار ی ایہ کشیدگی ایس قدر شدت اختیار کر جاندی اے کہ دفاتر میدان جنگ دا نظارا پیش کرن لگ پیندے نیں۔ کجھ لوک موجودا حکومت دے حق وچ تے کجھ اپوزیشن دا ساتھ دیندے نیں تے پارٹی بازی وچ اک دوجے دے خلاف ذاتی پروپگنڈے وی جنم لے لیندے نیں۔ سیاسی جنگ جہدے وچ کسے دے ذاتی مفاد موجود نہیں ہوندے آپس وچ تلخ کلامی تے اک دوجے اتے الزام تراشیاں دا سبب بن جاندی اے۔ کجھ لوک سابقا حکومت دے بجٹ نوں رد کردے ہوئے موجوداحکومت ولوں بہتر بجٹ پیش کرن دیاں امیداں لاندے نیں تے کجھ ایہدے خلاف کمنٹس دے رہے ہوندے نیں۔

بجٹ پیش ہون توں پہلے کرونا توں بعد تقریبن ہر بندے دی زبان اتے بجٹ اہداف اتے ای ون سونے نظریات تحت گلاں کیتیاں رہیاں سن۔ تقریبن ہر کوئی زیدا توں زیادا شرح وچ بجٹ پیش ہون دی اُمید کردا سی۔ تے موجودا حکومت توں ایہو توقع رکھی جارہی سی کہ پچھلے سال 10 فیصد تنخاواں وچ وادھا ہویا سی جد کہ ہن ایس توں ودھ وادھا ہووے گا۔ جدوں بجٹ پیش کیتا جاندا اے تے لوکاں دیاں توقعات توں ودھ یاں اوہدے برابر جے بجٹ پیش ہو جاوے تے وفاقی تے صوبائی ملازماں دی انج لگدا اے جویں عید ہو گئی یاں کوئی کمیٹی نکل آئی اے۔ فیر اوس توں بعد پہلی تنخا اتے مٹھائیاں ونڈیاں جاندیاں نیں تے خشیاں منائیاں جاندیاں نیں پئی تنخاواں وچ وادھا ہوگیا۔ جد کہ عقل دے ایہناں انھے لوکاں نوں ایہ علم نہیں ہوندا کہ جے تنخا ودھی اے تے مہنگائی یاں تے پہلے توں ودھ چکی ہوندی اے یاں فیر ودھن والی ہوندی اے کیوں جے بجٹ وچ تنخاواں وچ وادھے دی وجھا ای مہنگائی ہوندی اے۔ لوکاں نوں صرف ودھی تنخا نظر آرہی ہوندی اے جد کہ اوہدے پس پردا روز بروز ودھدی مہنگائی تے بے روزگاری نظر نہیں آوندی۔

ظاہری طور تے تنخاہ ودھ جاندی اے پر ضرورت دیاں شیواں تے بتی، پانی، گیس دیاں قیمتاں وچ اوس ودھی تنخاہ توں کدرے ودھ وادھا کر دتا جاندا اے پر اوس ویلے عقلمنداں دیاں عقلاں اتے پردا پے جاندا اتے تے جدوں سال بعد غربت دی شرح وچ مزید وادھا ہوجاندا اے تے فیر عقلاں اتے پئے پردے دے اُترن دا ویلا آوندا اے تے اگلا بجٹ پیش پیش ہوندا اے تے عقلاں اتے پیا پردا اُنج دا اُنج ای پیا رہندا اے تے بوسیدا ہو جاندا اے۔ اوس بوسیدا پردے وچ سانوں رہن دی عادت پے گئی ہوئی اے، کمزور تے غلامی دے ذہن والے ہون کر کے اسیں حقیقت دا ساہمنا کرن دی ہمت تے صلاحیت کھو چکے ہاں۔

ہونا تے انج چاہیدا اے کہ جدوں بجٹ پیش کیتا جاوے تے تنخاہواں وچ وادھے دی بجائے ٹیکس گھٹ لائے جان تے غربت دی شرح نوں گھٹایا جاوے۔ ویکھیا پرکھیا جانا چاہیدا اے کہ کیوں غریب بندا غریب توں غریب تر ہوندا جارہیا اے تے وڈیرے یاں امیر تاجر لوک امیر توں امیر تر ہوندے چلے جارہے نیں ایہدی وجھا صرف ایہو اے کہ اسیں کسے وی معاملے نوں اوہدی اندرونی ساکھ توں نہیں پرکھدے۔ ظاہری نظر آون والے فایدے نوں اسیں اپنا لینے آں اوہدے توں ملک و قوم تے اوہدی لوکائی کس دلدل وچ پھس سکدے نیں ایس گل دا کوئی نہیں سوچدا۔

ایس بجٹ وچ موجودا حکومت نے جدوں بجٹ پیش کیتا تے بالی ووڈ فلم دا اِک سین یاد آگیا۔ اوس فلم وچ تاجر موجودا سیاسی نیتا کول جاندے نیں تے ضرورت دیاں شیواں دیاں قیمتاں وچ وادھے دا مطالبا کردے نیں۔اوہناں مطالبا کیتا پئی 2رُپئے سی شے 4 رُپئے ویچن دی اجازت دتی جاوے۔ نیتا نے تاجراں نال کامیاب ڈیل کیتی آکھیا پئی قیمتاں 2 گُنا کرن دی بجائے 4 گنا ودھا دوو، یعنی 2 رُپئے دی شے 4 رُپئے ویچن دی بجائے 6 رُپئے دی ویچی جاوے۔ سارے تاجر خُش ہو گئے تے دھنی او نیتا جی تُسیں دھنی او ہدے نعرے بلند کردے ہوئے ٹُر گئے۔ اگلے دیہاڑے ملک دی عوام مہنگائی خلاف اکٹھی ہو گئی تے تھاں تھاں مظاہرے تے احتجاج ہون لگ پئے۔ ملک دے نیتا جی نے لوکائی توں مخاطب ہو کے آکھیا پئی ملکی حالات دے پیش نظر شیواں دیاں قیمتاں وچ وادھا بجا اے تے ایس قدر وادھو قیمتاں اُتے تہاڈے احتجاج کرن نوں وی رائیگاں نہیں جان دتا جاوے گا تے جے تہاڈی اجازت تے چاہت نال شیواں دیاں قیمتاں وچ 4 گنا وادھے دے بجائے 2 گنا کر دتا جاوے تے کیہ تہانوں اینا وادھا تے منظور اے۔ ساری لوکائی نے سانوں منظور اے منظور اے دی صدا بلند کیتی تے دھنی او نیتا جی تُسی دھنی او دے نعرے بلند کردے ہوئے اپنے اپنے گھراں نوں ٹُر گئے۔

ساڈے وزیراعظم پاکستان نے وی بجٹ دی سیاست وچ فلم دے ایس ای سین نوں فالو کیتا اے تے بجٹ توں کجھ ہفتے پہلے تیکر ایہو رولا پائی رکھیا کہ ملازماں دیاں تنخاواں وچ وادھے دی بجائے 20 فیصد کمی کیتی جاوے۔ وفاقی تے صوبائی گورنمنٹ دے ملازم ایسے پریشانی وچ سن کہ کدرے واقعے ای تنخاواں وچ وادھے دی بجائے کمی ای نہ کردتی جاوے۔ فیر بالکل فلم دے اوسے سین وانگ ڈراپ سین ہویا کہ حکومت نے بجٹ وچ نہ وادھا کیتا تے نہ گھاٹا لوکائی نے حکومت خلاف نعرے بازی تے نامنظور نامنظور موجودا بجٹ نامنظور دے نعرے بلند کرن دی بجائے سُکھ دا ساہ لیا پئی شُکر اے چلو جے تنخاواں وچ وادھا نہیں کیتا تے 20 فیصد گھاٹا وی تے نہیں کیتا۔ حکومت دی چال بازی دا ایہ پتا کامیاب لگا تے جوں کے توں بجٹ مطابق سارا سال گزارا کرن دا فیصلا کیتاگیا۔

مالی سال 2020-21دا وفاقی بجٹ قومی اسمبلی وچ پیش تے کردتا گیا پر صوبیاں نوں جو سپیشل گرانٹ دتی گئی اوہدے وچ پنجاب نال کانی ونڈ کیتی گئی۔ سندھ نوں 19ارب، کے پی کے نوں 56 تے بلوچستان نوں 10 ارب رُپئے گرانٹ دین دا اعلان کیتا گیا۔ صوبائی گرانٹس وچ پنجاب دا سرے توں کوئی نام و نشان موجود نہیں یعنی ملک دی 60 فیصد ابادی لئی پاکستان دے بجٹ وچ کوئی سپیشل گرانٹ ای موجود نہیں۔ ایتھوں اندازا ہوندا اے کہ پنجاب دے جنوبی علاقیاں دا رونا رون والی حکومت نوں پورے پنجاب نال کوئی ہمدردی نہیں۔پنجاب مخالف ایس بجٹ نوں پنجاب حکومت دی لوکائی رد کردی اے تے پنجاب نال ملک دشمن سیاستداناں دی ایس منفی سوچ نوں کامیاب نہیں ہون دووے گی۔ ایس توں پہلاں لوکائی دا دھیان ونڈن لئی پنجاب دی ونڈ دا تماشا رچایا گیا جہدی پنجاب دی غیور لوکائی نے ایس باندر ونڈ دی مخالفت کیتی تے ملک دشمن عناصر اپنے ایس مشن وچ ناکام ہو گئے۔

ہن حکومت ولوں پیش کیتاگیا بجٹ بل اودوں کامیاب ہووے گا جدوں ٹیکس اہداف تے مہنگائی وچ ہور وادھا کرن دی بجائے گھاٹا کیتا جاوے گا تے روزگار دے مواقع فراہم کیتے جان گے۔ کرونا وایرس پاروں بہت سارے لوکاں دا روزگار مُک گیا تے ملک وچ غربت دی شرح وچ بڑی تیزی نال وادھا ہویا۔ حکومت نوں چاہیدا اے کہ کوئی ایسا لائحہ عمل تیار کرے کہ ایس وبا دے وچ ای لوکاں نوں روزگار دے مواقع فراہم کرے تاں جے وایرس دی بجائے لوک بھکھ نال نہ مر جاون۔

٭٭٭٭٭