kraamaat@gmail.com
+ +92 333-430-6384


   اَج ایوان وچ پی ٹی آئی ایکے توں وکھ ہون دا اعلان کردا آں،واپسی دا سوچنا وی نہیں اے:چیئرمین  بلوچستان نیشنل پارٹی سردار اختر مینگل۔۔۔٭رویل نیوز٭


نمائندا رویل June 18, 2020


لاہور (نمایندا رویل) بلوچستان دی سیاسی جماعت بلوچستان نیشنل پارٹی (بی این پی) مینگل نے حکمران جماعت پاکستان تحریکِ انصاف (پی ٹی آئی) نال ایکے توں علیحدگی دا اعلان کر دِتا۔ بلوچستان نیشنل پارٹی دے چیئرمین سردار اختر مینگل نے قومی اسمبلی وچ کہیا کہ اج ایوان وچ پی ٹی آئی ایکے توں وکھ ہون دا اعلان کردا آں‘ اسیں ایوان وچ موجود رہواں گے تے اپنی گل کردے رہواں گے‘ پی ٹی آئی دے نال 2 معاہدے ہوئے‘ اسیں بنی گالا نہیں گئے‘ اوہ کوئٹہ آئے سن۔ اوہناں نے کہیا کہ 8 اگست 2018 نُوں پہلا معاہدا ہویا جہدے اُتے شاہ محمود قریشی‘ جہانگیر ترین تے یار محمد رند نے دستخط کیتے سن‘ اسیں مِسنگ پرسنز دا مسئلا حل کرن تے نیشنل ایکشن پلان اُتے لیٹر اینڈ سپرٹ دے نال عمل کرن دا مطالبا کیتا سی‘ ایہناں دوہاں معاہدیاں وِچوں کوئی دَس دیوے کہ کوئی اِک وی غیر آئینی مطالبا اے؟ چیئرمین بی این پی نے کہیا کہ کیوں اج تک ایہدے اُتے عملدرآمد نہیں ہویا؟ ایہ اوہ مائنڈ سیٹ اے جہڑا 1948 توں ٹُریا آ رہیا اے‘ چمن توں کراچی تک سڑک دی بنیاد 1973 وچ رکھی گئی سی‘ ساڈھے 4 ہزار لوک ایس سڑک اُتے دُکھانتاں دے نتیجے وچ واصل ہوئے نیں‘ سانوں 6 رویا دی بجائے 2 لین دی سڑک ای دے دین۔ اوہناں نے کہیا کہ کرونا وایرس دے علاج بارے کوئی کہندا اے کہ سناء مکی کھا لوو‘ کوئی کہندا اے کہ کلونجی کھا لوو‘ اسیں تے سبھ سبزیاں کھا کھا کے تھَک گئے‘ کرونا وایرس نُوں نظر انداز کر کے تفتان بارڈر انج کھولیا گیا جویں ماضی وانگوں ڈالرز آن گے‘ تفتان بارڈر کھولنا ای سی تے احتیاطی تدبیراں اختیار کیتیاں جاندیاں۔ اختر مینگل نے کہیا کہ ایہ نہیں کہندے کہ لوکاں نُوں بند کر دِتا جاندا پر کوئی بہتر انتظامات تے کر دیندے‘ اوہناں نُوں جہناں کیمپاں وچ رکھیا گیا اوتھے کوئی اِک گھنٹا نہیں لنگھا سکدا سی‘ تفتان بارڈر اُتے نالایقی نال جہڑیاں ہلاکتاں ہوئیاں اوہناں دی ایف آئی آرز حکمراناں دے خلاف کٹی جاوے‘ بجٹ دے لوکائی دوست ہون دے اگے امکانات وی نہیں نیں۔ اوہناں نے کہیا کہ ایس ملکو چ انصاف ملدا نہیں وِکدا اے‘ ایتھے انصاف منڈیاں وچ وِکدا اے‘ پاکستان سٹیل ملز دی نجکاری کر کے ہزاراں لوکاں نُوں بیروزگار کیتا جا رہیا اے‘ افسوس دی گل اے کہ ایتھے اوہناں دی اواز سنن والا کوئی نہیں‘ لگدا اے کہ ایس ایوان نُوں ہائیڈ پارک کارنر بنا دِتا گیا اے جتھے صرف تقریراں ہوندیاں نیں۔ اوہناں نے کہیا کہ جے تجویزاں نُوں حل نہیں کر سکدے تے گھٹ توں گھٹ ایہناں نوں نوٹ تے کر لین‘ جے نوٹس لین لئی سرکار کول کاغذ تے پنسل نہیں تے اسیں چندا دین نُوں تیار آں‘ روایت بن گئی اے کہر گل دا ذمے دار پچھلی حکومت نُوں متھ دِتا جاندا اے‘ ایہ مت کہوو کہ سانوں خالی خزانا ورثے وچ مِلیا اے‘ حکومتی وزیر نے بجٹ تقریر وچ کہیا کہ این ایف سی ایوارڈ اُتے نظرثانی ہوے گی‘ بجٹ دستاویز دے صفحا نمبر 15 اُتے لکھیا اے کہ این ایف سی ایوارڈ اُتے نظرثانی ہووے گی‘ کیہ ایہ سلپ آف ٹنگ اے یاں مس پرنٹ؟ نہیں جناب ایہ تہاڈی پالیسی دا حصا اے‘ ایہدے اُتے وضاحت چاہواں گا‘ این ایف سی ایوارڈ اُتے نظرثانی 18 ویں ترمی نُوں رول بیک کرن دیاں کوششاں دا حصا اے۔ اوہناں نے ہور کہیا کہ بلوچستان دا مسئلا سیاسی اے‘ خدا لئی بلوچستان نُوں نال لے کے چلنا چاہندے او تے ساڈے نال کیتے معاہدیاں اُتے عمل کرو۔اوہناں نے ایہ وی کہیا کہ ہتھ ملایا سی تہاڈے نال‘ گلا نہیں کر رہے‘ صدر‘ سپیکر‘ ڈپٹی سپیکر‘ چیئرمین سینٹ سنے ہر موقع اُتے ووٹ دِتا‘ اپوزیشن تے حکومتی بینچز ولوں الزام لایا گیا کہ 10 ارب رُپئے وچ اسیں وِک گئے؟ تہاڈا اِک اِک وال بلوچستان دا قرض دار نکلے گ‘ بلوچستان تہاڈا قرض دار نہیں ہووے گا۔