پٹرول بحران پیدا کرن والیاں کمپنیاں خلاف کارروائی دی ہدایت:وزیراعظم عمران خان۔۔۔٭رویل نیوز٭

اسلام آباد (نمایندا رویل) وزیراعظم عمران خان نُوں پٹرول بحران دی تفصیلی رپورٹ پیش کر دِتی گئی جہدے وچ پٹرول بحران دے ذمے داراں دا تعین وی کیتا گیا اے جد کہ وزیراعظم نے بحران وچ شامل ساریاں کمپنیاں دے لائسنس منسوخ‘ ملوث بندیاں نُوں گرفتار کرن تے ذخیرا شدا پٹرول مارکیٹ وچ سپلائی کرن دا حکم دے دِتا۔ وزیراعظم نُوں پیش کیتی گئی رپورٹ وچ اوگرا نے پٹرول بحران دی ذمے داری پٹرولیم ڈویژن اُتے عاید کیتی اے۔ رپورٹ دے مطابق آئل مارکیٹنگ کمپنیاں نے جان بُجھ کے بحران پیدا کیتا‘ ڈی جی آئل ڈاکٹر شفیع آفریدی تے پٹرولیم ڈویژن افسران اپنی ذمے داری پوری کرن وچ ناکام رہے۔ وزیراعظم نے پٹرول بحران وچ ملوث کمپنیاں تے ذمے داراں دے خلاف کارروائی دی ہدایت کردیاں ہویاں ملوث بندیاں نُوں گرفتار تے ذخیرا شدا پٹرول جبری طور اُتے مارکیٹ وچ سپلائی کرن دا حکم دے دِتا۔ وزیراعظم نے کہیا کہ پٹرول بحران کسے صورت برداشت نہیں کیتاجاوے گا‘ بحران وچ ملوث کمپنیاں دے لائسنس معطل تے منسوخ کیتے جان‘ ساریاں آئل مارکیٹنگ کمپنیاں نُوں 21 دن دا ذخیرا یقینی بنان دا پابند کیتا جاوے۔ایس توں وکھ وزیراعظم عمران خان نے اتحادی پارٹی بی این پی نُوں مناون لئی پرویز خٹک دیا گوائی وچ مذکاراتی ٹیم نُوں ٹاسک سونپ دِتا اے۔ وزیراعظم نے کہیا اے کہ بی این پی مینگل سنے سارے اتحادی ساڈے لئی اہم نیں‘ سارے دھڑکو دور کیتے جان۔ وزیراعظم نے مذاکراتی ٹیم نُوں ہدایت کیتی کہ چھیتی توں چھیتی بی این پی نال رابطا کیتا جاوے تے اوہناں نُوں عملدرآمد نہ ہون والے نکات دیاں وجھاں توں وی اگاہ کیتا جاوے۔