kraamaat@gmail.com
+ +92 333-430-6384


کرونا وایرس نال  موتاں دی تعداد 3093ہو گئی، ”سلیکٹڈ لاک ڈاؤن“ دی منظوری……٭رویل نیوز٭


نمائندا رویل June 19, 2020


لاہور (نمایندا رویل) پچھلے 24 گھنٹیاں دوران پورے ملک وچ کرونا دے ہور 118 روگی چلانا کر گئے جہدے نال مَوتاں دی مجموعی گنتی3093 ہو گئی اے جد کہ5358 روگیاں دا وادھا ہویا اے‘31 ہزار 500 ٹیسٹ کیتے گئے‘ کرونا وایرس توں صحت یاب ہون والیاں دی گنتی 59 ہزار 215 ہو گئی۔این سی او سی دے مطابق ایس ویلے ملک وچ ایکٹو کیساں دی گنتی 97 ہزار 810 اے‘ پنجاب وچ کرونا روگیاں دی گنتی 60 ہزار 138 تک پہنچ گئی اے۔ دوجے پاسے پنجاب سرکار نے کرونا وایرس نال متاثرا بندیاں دی گنتی وچ مسلسل وادھے نُوں سنگین خطرا متھدیاں ہویاں ”سلیکٹڈ لاک ڈاؤن“ دی منظوری دے دِتی اے جہدے اُتے جمعرات دی صبح توں عملدرآمد شروع کر دِتا گیا اے‘ ہاٹ سپاٹ متھے گئے منتخب علاقیاں وچ لاک ڈاؤن 30 جون تک جاری رہوے گا‘ ایس ضمن وچ ایڈیشنل چیف سیکرٹری (ہوم) پنجاب مومن آغا نے باقاعدا تحریری حکمناما جاری کر دِتا اے جہدے تحت ہاٹ سپاٹ متھے گئے علاقیاں دے سارے داخلی تے خارجی راہواں اُتے پولیس تے رینجرز تعینات کیتی جاوے گی‘ کسے نُوں بغیر ضرورت آوا جائی دی اجازت نہیں ہووے گی‘ لوڑی دیاں شیواں دے علاوا ہر طرحاں دا کاروبار زندگی معطل رہوے گا‘ ساریاں مارکیٹاں‘ شاپنگ مال‘ ریسٹورنٹ‘ سرکاری‘ نیم سرکاری تے نجی دفاتر مکمل بند رہن گے۔ لاک ڈاؤن وچ آن والے علاقیاں وچ بندیاں تے پبلک ٹرانسپورٹ دی آوا جائی اُتے مکمل پابندی ہووے گی‘ لوڑ دے تحت پرائیویٹ گڈی وچ صرف 1 بندے نُوں آوا جائی دی اجازت ہووے گی‘ کسے وی قسم دے مذہبی‘ سیاسی تے سماجی اجتماعواں اُتے مکمل پابندی ہووے گی۔