سلامتی کونسل دی غیر مستقل رکنیت لئی بھارت نُوں بغیر مقابلے کیوں چُنیا:شیریں مزاری۔۔۔٭رویل نیوز٭

نیو یارک (نمایندا رویل) اقوام متحدا دیاں قرار داداں دی کھلم کھلا خلاف ورزی کرن تے مظلوم کشمیریاں اُتے مظالم ڈھان والا بھارت اقوام متحدا دا غیرمستقل رکن بنن وچ کامیاب ہو گیا۔ غیرملکی خبر رساں ایجنسی دے مطابق اقوام متحدا دی جنرل اسمبلی نے 2 سال لئی سلامتی کونسل دے غیر مستقل اراکین دا انتخاب کیتا اے جہدے وچ ناروے‘ میکسیکو تے آئر لینڈ وی غیر مستقل رکن بن گئے نیں‘ بھارت نُوں اقوام متحدا دے 192 وِچوں 184 ملکاں نے ووٹ دِتے جہدے بعد بھارت پہلی جنوری 2021 توں 31 دسمبر 2022 تک سلامتی کونسل دا غیر مستقل رکن منتخب ہو گیا اے‘ دوجے پاسے ترکی دے ولکان بزکیر اقوام متحدا دی جنرل اسمبلی دے صدر منتخب ہو گئے نیں۔ رپورٹ دے مطابق سلامتی کونسل دے غیر مستقل اراکین دی اِک سیٹ حالے وی خالی اے‘ پاکستان نے بھارت دے خلاف ووٹ دِتا۔دوجے پاسے پاکستانی وفاقی وزیر انسانی حقو ق شیری مزاری نے کہیا اے کہ پاکستان دا سوال اے کہ سلامتی کونسل دی غیر مستقل رکنیت لئی بھارت نُوں بغیر مقابلے کیوں منتخب ہون دِتا۔ پاکستان بھارت دی بہت پہلے کیتی گئی نامزدگی اُتے راضی کیوں ہویا۔ اوہناں نے سوشل میڈیا بیان وچ ہور کہیا کہ مقبوضا کشمیر دی حیثیت دی تبدیلی‘ پاکستان‘ چین تے نیپال دے نال جاری جھیڑے دے ہوندیاں ہویاں بھارت دا بلا مقابلا انتخاب اوہدے اقدامات نُوں قانونی حیثیت دینا اے۔ شیری مزاری دا کہنا اے کہ پاکستان لئی سوال اے کہ اسیں انج کیوں ہون دِتا کہ سلامتی کونسل وچ ہور کوئی مقابلے وچ حصا نہیں لے سکدا‘ پاکستان بھارت دی بہت پہلے کیتی گئی نامزدگی اُتے راضی کیوں ہویا؟۔