ودھدیاں ہوئیاں سیاسی تے معاشی ناہمواریاں، سرکاری ملازم مایوسی دا شکار

12 جون نوں پاکستان تحریک انصاف دی حکومت نے دوجا وفاقی بجٹ برائے سال 2020-21 پیش کیتا۔ ایہدے وچ کوئی شک نہیں کہ ایس ویلے ملک مشکل حالات توں لنگھ رہیا اے۔ کرونا پاروں لوکائی پریشان نیں۔ ملک وچ کرونا کیسز دی گنتی وچ تیزی نال وادھا ہورہیا اے۔ وفاقی وزیر صنعت تے پیداوار حماد اظہر نے قومی اسمبلی وچ 7294 ارب دا بجٹ پیش کیتا۔ حکومت نے تنخاواں تے پنشن وچ وادھے بغیر 3437 ارب دے خسارے دا بجٹ پیش کیتا اے۔ وفاقی وزیر صنعت تے پیداوار نے ماضی دے وزیراں وانگ الفاظ دے گورکھ دھندے وچ اُلجھا کے اپنے ولوں بہترین بجٹ پیش کرن دی کوشش کیتی اے پر اپوزیشن جماعتاں سنے مختلف طبقیاں ناصرف حالیا بجٹ توں ناخشی دا اظہار کیتا سگوں اوہ حکومتی کمکاری توں وی ناراض نظر آوندے نیں۔ بجٹ دے آنکڑیاں توں تے خورے لوکائی نوں کوئی فرق پوے پر کسے نہ کسے طرحاں ہر بندے نوں متاثر کیتا اے۔ بجٹ دے متوازن یاں غیر متوازن دا فیصلا ملک دے موجودا معاشی حالات تے لوکائی نوں درپیش مشکلاں تے اوہناں دے حل نوں ویکھدے ہوئے ای کیتاجاسکدا اے پر اج دے دور وچ لوکائی دے وڈے مسئلیاں وچ مہنگائی، بے روزگاری، صحت تے تعلیم دی ناکافی سہولتاں تے سماجی تے معاشرتی ترقی دے برابر نہ ہونا اے۔ بجٹ وچ محنت کش طبقیاں تے سرکاری ملازماں لئی کجھ نہیں اے۔ آئی ایم ایف دی ڈکٹیشن تے بنن والے بجٹ وچ ملازماں نوں نظر انداز کردتا گیا اے۔ بجٹ وچ کوئی ریلیف نہیں دتا گیا۔ کرونا توں تے خورے ملازم بچ جان پر مہنگائی تے بے روزگاری پاروں اوہناں داجیوندا رہنا محال نظر آوندا اے۔ انج محسوس ہوندا اے کیہ حکومت ملازماں تے پنشنرز دیاں تنخاواں وچ وادھا نہ کرکے اوہناں نوں جیوندا مار دینا چاہندی اے۔سرکاری ملازم انصاف دی حکومت توں امید لائے ہوئے سن کہ بجٹ وچ اوہناں دا چنگا ریلیف ملے گا پر بجٹ نے ملازماں دیاں امیداں اتے پانی پھیر دتا اے۔ لوکائی نے بجٹ توں پہلاں حکومت توں بہت ساریاں توقعات لائیاں سن پر بجٹ بعد سبھ دم توڑ گئیاں۔ افراط زر توں لوکائی دی قوت خرید وچ ہون والی کمی پاروں توقع سی کہ تنخاہواں وچ وادھا ہووے گا۔ ریلیف نہ ملن دی صورت وچ سرکاری ملازم امسال 10فیصد گھٹ خریداری کرسکن گے۔ پاکستان ایہناں دناں وچ تاریخی چیلنجز دا ساہمنا کررہیا اے۔ کرونا پاروں اج ہر پاکستانی دی جان خطرے وچ اے۔ بجٹ وچ عام بندے نوں کوئی ریلیف نہیں ملیا، جے ریلیف ملیا اے تے امیر بندے نوں۔ بجٹ وچ عام بندے نوں صرف تکلیف ای ملی اے۔ جون 2013 وچ ڈالر دی قیمت 100 رُپئے سی تے 5 سال بعد جون 2018 تیکر ڈالر وچ صرف 15 رُپئے وادھا ہویا سی۔ اوہدے بعد پاکستانی رپئے دی قدر وچ اک سال وچ 30فیصد کمی ہوئی تے جون 2019 وچ ڈالر 150 دی سطح اتے اپڑ گیا۔ اگلے سال دوران ڈالر دی قدر وچ ہور وادھا ہویا تے 2020 وچ فی ڈالر 165 فیصد تیکر اپڑگیا۔ ہن ایہناں حالات وچ مہنگائی تے ودھدی رہی تے ہور ودھ رہی اے پر لوکائی دیاں مشکلاں نوں کسے نے سمجھن دی کوشش نہیں کیتی۔ پچھلے 15 سال وچ پہلی واری وفاقی بجٹ وچ سرکاری ملازماں دیاں تنخاہواں تے ریٹایرڈ ملازماں دیاں پنشن وچ وادھا نہیں کیتاگیا۔ حکومت نے پچھلے مالی سال 2019-20 دے بجٹ وچ سرکاری ملازماں دیاں تنخاواں وچ 10فیصد ایڈہاک ریلیف دتا سی۔ 2010-11 وچ پی پی دی حکومت نے سب توں ودھ 50 فیصد وادھا کیتا سی۔ ملک وچ مہنگائی تے مزدور دی اجرت دی گل کیتی جاوے تے اج توں 12سال پہلے مزدور دی اجرت 6 ہزار سی جہنوں پی پی دی حکومت نے 8ہزار کیتا۔ بعد وچ ن لیگ دے دور وچ پہلی مالی سال وچ مزدور دی اجرت 10 ہزار کیتی گئی فیر آخری مالی سال وچ ایہ اجرت ودھا کے 15 ہزار مقرر کیتی گئی۔ پی ٹی آئی دی حکومت نے اپنے پہلے مالی سال وچ گھٹو گھٹ اجرت وچ 25 سو دا وادھا کیتا تے ساڈھے 17 ہزار مزدور دی اجرت ہوگئی۔ پر حالیا بجٹ وچ وادھا نہ کر کے حکومت مہنگائی دی صورت وچ لوکائی دیاں مشکلاں وچ وادھا کیتا اے۔ خورے حکمران ایہ بھل رہے نیں کہ سب توں ودھ ٹیکس سرکاری ملازماں دیاں تنخاہواں توں کٹیاں جاندا اے۔ سرکاری ملازم پُرامید سن کہ ریلیف الاونس نوں ضم کر کے پے سکیل روایز کیتا جاوے گا۔ سرکاری ملازماں دے ہاوس رینٹ وچ وادھا کیتا جاوے گا۔ پر بدقسمتی نال انج نہیں ہوسکیا۔ حکومت ایس ویلے سکیل 1 دے ملازم دی تنخاہ 1367 ہاوس رینٹ دے رہی اے تے مہنگائی دے ایس دور وچ اینے رُپئیاں نال مکان کرائے اتے نہیں ملدا۔ انجے ای میڈیکل الاونس 1500 دیندی اے۔

ملک وچ نہ تے کرونا جاندا وکھالی دے رہیااے تے نہ ای حکومت مہنگائی تے بے روزگاری دے جن نوں بوتل وچ بند کرن وچ کامیاب ہو سکے گی۔ ایہدے وچ کوئی شک نہیں کہ عمران خان نے ملک وچ بہتری لیان دی کوشش کیتی پر اوہ حالے تیکر کسے وی صورت کامیاب نہیں ہوسکے۔ تحریک انصاف اپنے اقتدار دے ادھ عرصے تیکر اپڑ چکی اے پر حالے تیکر اوہ پچھلی حکومت نوں لعن طعن کر کے ویلا لنگھا رہی اے خور ے ایہو کارن اے کہ اوہ اک متوازن تے غریب بندے نوں ریلیف دین والا بجٹ پیش نہیں کرسکی۔

جے ماضی دی گل کیتی جاوے تے پی پی تے ن لیگ بہتربجٹ پیش کردی رہی اے سگوں جدون ملک وچ دہشت گردی عروج اتے سی ملکی معاشی حالات وی بہتر نہیں سن اوس دور وچ وی ن لیگ نے سرکاری ملازماں نوں مایوس نہیں کیتاسی پر موجودا حکومت نے کرونا نوں جواز بنا کے سرکاری تے ریٹایرڈ ملازماں نال جو ہتھ کیتا اے اوہ کسے وی صورت تعریف جوگ نہیں اے۔ ممبران اسمبلی تے ہور کجھ اداریاں دیاں تنخاواں وچ بجٹ توں کجھ مہینے پہلاں وادھا کردتا گیا تے بجٹ دے موقع اتے ملازماں نوں سوہے فیتے دا نشان بنا دتا گیا۔ ضرورت دیاں شیواں دیاں قیمتاں اسمان نوں چھو رہیاں نیں۔ غریب تے متوسط طبقیاں نوں جان دے لالے پئے ہوئے نیں روپئے دی قدر وچ غیر معمولی کمی ہوئی اے غریب طبقے دی آمدن نہ ہون برابر اے ہن وی ملازم پیشا طبقے نوں حکومت ول ویکھ رہے نیں تے حکومت نوں چاہیدا اے کہ ملازماں نوں مایوس کرن دی بجائے اوہناں دیاں مشکلاں دا ازالا کردے ہوئے تنخاہواں وچ وادھا کرے۔

٭٭٭٭٭