بُڈھے وارے دے آن لائن عشق نے کروڑاں رُپئے گوا ئے

ممبئی(نیٹ نیوز)79ورھیاں دا بابا آن لاین ڈیٹنگ دے فراڈ وچ کروڑاں رُپئے گوا بیٹھا۔تفصیل دے مطابق یورپی سوشل میڈیا دی سایٹ اُتے اک 79ورھیاں دے بابے دی اک سال پہلاں اک سوانی نال دوستی ہوئی۔ پولیس نے دسیا کہ ایس کیس دی چھیتی ای ایف آئی آر درج کیتی جائے گی۔ پولیس دا کہنا اے کہ متاثرا بندا اک (ر) انجینئر اے جہنے اپنی بیوی دے ڈیڈھ کروڑ رُپئے دے زیورات ایس فراڈ وچ روڑھ دتے۔جدوں کہ اوس فراڈن سوانی خاطر ملند وچ موجود اپنا فلیٹ تیکر ویچن نوں تیار ہو گیا۔ پر امریکا وچ وسدے اوہدے پُتر نے اوہنوں اِنج کرن توں ڈکیا۔پولیس دا کہنا اے کہ متاثرا بندے دی اک یورپین سوشل میڈیا سایٹ اُتے 44ورھیاں دی ہسپانوی سوانی نال دوستی ہوئی سی جہنے اپنا ناں ویویان لوٹ دسیا سی۔اوس نے بابے کولوں کڑوڑاں رُپئے لُٹ لئے تے فیر اپنا اکائنٹ وی مُکا دِتا پر بابا حالے وی ایس گل تے اڑیا اے کہ اوہدے نال اوہ ہسپانوی سوانی سچا عشق کردی سی ۔