پاکستان بھارت دی کسے وی مہم جوئی دا بھرواں جواب دیوے گا: شاہ محمود قریشی  ……٭رویل نیوز٭

اسلام آباد (نمایندا رویل) وزیر خارجا شاہ محمود قریشی نے ایوان بالا وچ پالیسی بیان دیندیاں ہویاں کہیا اے کہ بھارت لداخ اُتے چین دے ہتھوں حزیمت چُکن دے بعد پاکستان خلاف فالس فلیگ اپریشن کر سکدا اے‘ پاکستان بھارت دی کسے وی مہم جوئی دا بھرواں جواب دیوے گا‘ سلامتی کونسل وچ بھارت دے خلاف برملا ووٹ دے کے اسیں اوہنوں ایہ باور کروایا اے کہ اوہ اقوام متحدا دیاں قرار داداں دیاں خلاف ورزیاں کر رہیا اے۔ سینٹ وچ خیالاں دا اظہار کردیاں ہویاں شاہ محمود قریشی نے کہیا کہ سیکیورٹی کونسل وچ 5 مستقل تے 10 غیر مستقل ممبر نیں جہدے وچ بھارت 7 وار تے پاکستان وی 7 وار سیکیورٹی کونسل دا رکن بن چُکیا اے پر بھارت سیکیورٹی کونسل دا پہلے رکن بن کے کشمیر اُتے اقوام متحدا مؤقف بدلن وچ کامیاب ہویا۔ وزیر خارجا نے کہیا کہ سلامتی کونسل وچ خفیا بیلٹ ہوندا اے تے اسیں ووٹ پان توں اجتناب نہیں کیتا پر جے بھارت دے دوست نیں تے ساڈے وی دوست نیں‘ جے اوہ اپنے مفاد نُوں اگے ودھان دی کوشش کرن گے تے ساڈے دوست بلاک کرن گے۔ اوہناں نے کہیا کہ چین دا مؤقف اصولی اے‘ بھارت دی ہٹ دھرمی نال معاملا خونی جھیڑے وچ بدلیا اے۔ اوہناں نے کہیا کہ کشمیر اُتے گل کرن توں سانوں کوئی نہیں روک سکدا‘ بھارت گیڈر بھپکیاں بند کرے‘ پاکستا اپنا دفاع کرنا جاندا اے اوہناں نے کہیا کہ سلامتی کونسل وچ اسیں بھارت خلاف ووٹ استعمال کیتا کیوں جے بھارت نے اقوام متحدا دے چارٹرڈ دی خلاف ورزی کیتی سی۔ بھارت تے چین دے سرحدی جھیڑے اُتے شاہ محمود قریشی دا کہنا سی کہ بھارت دا پنج اگست دا فیصلا چین رَد کر چکیا اے جہدے کارن خطے وچ ڈرامائی تبدیلی اے‘ اج لداخ وچ کیہ ہو رہیا اے؟ بھارت دے فوجیاں دیاں لاشاں چُکیاں جا رہیاں نیں۔ اوہناں نے ہور کہیا کہ چین دے علاوا نیپال اج کَہ رہیا اے بھارت ایہ علاقے تہاڈے نہیں‘ ساڈے نیں‘ اج چین‘ نیپال‘ پاکستان تِنے ملک بھارت دے خلاف نیں‘ ایس صورتحال وچ بھارت کلا ہو رہیا اے‘ دباء وچ آ رہیا اے‘ ایس لئی اوہ فالس فلیگ اپریشن کر سکدا اے پر بھارت خبردار رہوے کجھ کیتا تے فروری یاد رکھے۔