مہنگا آٹا ای ملے گا،سرکار تے فلور ملز مالکاں وچکار جھیڑا حل نہ ہویا  ……٭رویل نیوز٭

لاہور (نمایندا رویل) فلور ملز تے حکومت وچکار آٹے دے بھاء دا جھیڑا حل نہ ہو سکیا‘لاہور وچ 20 کلو آٹے دا تھیلا 1035 رُپئے وچ وِکن لگا۔ لوڑی دیاں شیواں وچ آٹا سبھ توں ضروری اے‘ نویں کنک دا سیزن آیا تے آٹا سستا ہون دی بجائے مہنگا کرن دی پُٹھی چکی چل پئی۔ 1 مہینے پہلاں 825 رُپئے وچ دستیاب 20 کلو آٹے دا تھیلا ہُن 1035 رُپئے تے 10 کلو دا تھیلا 525 رُپئے وچ مل رہیا اے۔ اِک مہینے دے دوران 20 کلو آٹے دا تھیلا 210 رُپئے مہنگا ہو چُکیا اے۔ فلور ملز مالکان دا کہنا اے کہا وپن مارکیٹ وچ کنک 1900 رُپئے من تک پہنچ چکی اے‘ پرانی قیمت اُتے آٹا نہیں ویچ سکدے۔ یاد رہوے کہ حکومت نے دعوا کیتا سی کہ آٹا مہنگا نہیں کرن دواں گے پر سبھ دعوے ہوا ہو گئے۔ دُکاندار کہندے نیں کہ فلور ملاں جہڑی قیمت مقرر کر رہیاں نیں اوہدے اُتے آٹا ویچ رہے آں۔ لوکائی نے حکومت توں ایس مسئلے دا نوٹس لین دامطالبا کردیاں ہویاں کہیا اے کہ گھٹ توں گھٹ آٹا تے مناسب بھاء اُتے ملنا چاہیدا اے۔ حکومتی سطح اُتے حالے صرف دعویاں نال ای کم لیا گیا اے‘ پر انتظامیا ولوں ٹھوس اقدامات دے منتظر آں۔ایس توں وکھ مسلم لیگ ن دی رکن حناء پرویز بٹ نے 20 کلو آٹے دا تھیلا 1035 رُپئے وچ وکن خلاف پنجاب اسمبلی وچ قرار داد جمع کروا دِتی۔ پنجاب اسمبلی دا ایہ ایوان 20 کلو آٹے دے تھیلے دی قیمت 1030 رُپئے کرن دی شدید نندیا کردا اے۔ کرونا وایرس تے لاک ڈاؤن کارن عام بندا پہلے معاشی بحران دا شکار اے۔ حکومت آئے دن غریب بندے اُتے مہنگائی بمب سُٹ رہی اے۔ حکومت نے کھنڈ مافیا وانگوں فلور ملز دے ساہمنے وی گوڈھے مودھے مار دِتے نیں۔ فلور ملز مالکان اپنی مرضی دیاں قیمتاں وصول کر رہے نیں۔ایہ ایوان مطالبا کردا اے کہ آٹے دی قیمت وچ وادھے دا فوری نوٹس لیا جاوے تے 20 کلو آٹے دے تھیلے دی پرانی قیمت بحال کیتی جاوے۔