زراعت کہانی/ڈاکٹر بشیر گورایا

زراعت کہانی

ڈاکٹر محمد بشیر گورایا

س1۔ڈاکٹر محمد بشیر گورایا کدوں تے کتھے پیدا ہوئے؟

ج۔ڈاکٹر محمد بشیر گورایا پہلی جنوری 1940ء نوں پیدا ہوئے۔آپ چک 44 ضلع گجرات وچ پیدا ہوئے۔

س2۔ڈاکٹر محمد بشیر گورایا نے کہڑیاں کتاباں لکھیاں؟

ج۔۱)پنجابی قاعدہ۔۲)ابیات باہو دا ترجمہ تے تشریح۔۳)سورۃ یسٰین دا پنجابی ترجمہ تے تشریح

س3۔زمین دا کُل رقبہ کِنا اے؟

ج۔زمین دے عالماں دے مطابق زمین دا کُل رقبہ 30 اَرب ایکڑ اے۔ جہدا تِن بٹا دَس حصہ خشکی تے باقی سبھ پانی اے۔

س4۔پہلاں پہل لوک کِتھے اباد ہوندے سن؟

ج۔پہلاں پہل لوک دریاواں،برساتی نالیاں تے نیویاں ٹویاں دے کول اباد ہوندے سن کیوں جے ایتھوں اوہناں نوں اپنی لوڑ واسطے پانی لبھ جاندا سی۔

س5۔”جَھٹا لانا“ کِس نوں آکھدے نیں؟

ج۔ڈونگھیاں ٹویاں،چھپڑاں وچوں پانی کنارے تے کھلو کے کسے دابڑے،کڑاہی یاں تانبیے نال پانی باہر نالی وچ سُٹیا جاندا اے جس نال پانی اسانی نال فصل تیک اپڑدا اے ایس نوں جھٹا لانا آکھدے نیں۔

س6۔پرانے زمانے وچ لوک کویں کھان پین لئی گزارا کردے سن؟

ج۔پرانے زمانے وچ لوک جنگلی پھلاں نال گزارا کردے سن اوہ بیر،پِیلوں ورگے پھل کھا کے گزارا کردے سن۔

س7۔زراعت وچ مُڈھلا انقلاب کویں آیا؟

ج۔ہل پنجالی نال جانوراں دے استعمال نال زراعت وچ مُڈھلا انقلاب آیا۔

س8۔واہی وان نوں کیہ کیہ ناں نال جانیا جاندا اے؟

ج۔واہی وان۔جٹ۔زمیندار۔کسان۔مزارع۔ راہک۔ہاری

س9۔کہڑے صوفی شاعر نے کھوہ تے جھلار بارے ذکر کیتا اے؟

ج۔میاں محمد بخش نے اپنی کتاب ”سیف الملوک“وچ کھوہ تے جھلار بارے ذکر کیتا اے۔

س10۔کھوہ تے جھلار وچ کیہ فرق اے؟

ج۔کھوہ زمین نوں کھدائی کر کے بنانا پیندا اے جد کہ جھلار کسے برساتی نالے یاں چھپڑ کنڈھے ٹویا کڈھ کے بنایا جاندا اے تے پانی رِڑھ کے ایس ٹوئے وچ آ جاندا اے۔

س11۔زراعت دے کِنے جُز نیں؟

ج۔زراعت دے تِن جُز نیں 1۔پانی 2۔ بی3 ۔افرادی قوّت

س12۔زراعت لئی پانی دی لوڑ کویں پوری کیتی جاندی اے؟

ج۔دریاواں توں نہراں،بیراج،ہیڈ تے ڈیم بنائے جا رہے نیں کئی مُلکاں وچ تاں مصنوعی بارشاں وی وسان دا بندوبست اے۔

س13۔زراعت وچ ”بی“ واسطے کیہ کیتا جا رہیا اے؟

ج۔پرانے زمانے وچ بی زیادہ پیداوار نہیں دیندے سن پر ہُن بِماریاں توں پاک بی تیار کیتا جاندا اے جو بہتا جھاڑ دیندے نیں۔اجکل تے بے موسمی سبزیاں تے پھلاں واسطے وی بی تیار ہو رہے نیں۔

س14۔پنجاب دی سبھ توں وڈی فصل کہڑی اے؟

ج۔کنک

س15۔ کنک دی فصل چُک کے کیہ کیتا جاندا اے؟

ج۔کنک دی فصل دی بیجائی تے کٹائی واسطے بہت دھیان دِتا جاندا اے،ایس دی فصل نوں چُک کے مُنڈیاں کُڑیاں دے ویاہ کیتے جاندے نیں۔

س16۔کنک دی کٹائی کویں ہوندی اے؟

ج۔کنک دی کٹائی تے گہائی لئی ونگاراں پائیاں جاندیاں نیں۔ڈھول والا سارا دن ڈگا لائی رکھدا اے تے گھر دیاں عورتاں مِٹھے پکوان پکاندیاں نیں۔

س17۔پنجاب دی دوجی وڈی فصل کہڑی اے؟

ج۔پنجاب دی دوجی وڈی فصل ”مُنجی “اے جس نوں چاول وی آکھدے نیں۔

س18۔مُنجی دی فصل کویں کاشت ہوندی اے؟

ج۔مُنجی دا بی پہلاں اک تھاں چھٹے نال بیج دِتا جاندا اے۔جد بوٹے فُٹ سوا فُٹ دے ہوندے نیں تاں اوہناں نوں اُکھیڑ کے کدو کیتے کھیتاں وچ پانی والی نرم زمین وچ لا دِتا جاندا اے۔ایہناں بوٹیاں نوں لاب آکھیا جاندا اے۔

س19۔کپاہ کیہو جہی فصل اے؟

ج۔کپاہ ریشے دار فصل اے،ایس دے کپڑے،کھیس چادراں تے رسّے بنائے جاندے نیں۔

س20۔کپاہ دے بی کس کم آندے نیں؟

ج۔کپاہ دے بی دا تیل کڈھیا جاندا اے جو کھانیاں وچ کم آندا اے۔ بی دے خول نوں ”کھل“ آکھیا جاندا اے اوہ جانوراں دے چارے واسطے کم آندا اے۔

س21۔”تریڑا“ کس نوں آکھدے نیں؟

ج۔جانوراں لئی چارا حاصل کرن واسطے مکئی دی فصل وچ کپاہ بیج دِتی جاندی اے ایس نو ” تریڑا “ کہندے نیں۔

س22۔کپاہ کہڑے علاقیاں وچ کاشت کیتی جاندی اے؟

ج۔مُلتان،بہاولپور،مظفر گڑھ،ساہیوال،وہاڑی،رحیم یار خاں۔بہاول نگر تے خانیوال

س23۔ساڈے کِنے طبقے زراعت نال تعلق رکھدے نیں؟

ج۔ ساڈے تِن طبقے زراعت نال تعلق رکھدے نیں،وڈے جاگیردار تے زمیندار۔چھوٹے درجے دے زمیندار۔مزارعے،راہک تے ہاری۔

س24۔پنجاب وچ پہلی وارٹریکٹر کدوں آئے؟

ج۔پنجاب وچ پہلی وار ٹریکٹر 1950ء وچ آنے شروع ہوئے۔

س25۔ریشے دار فصلاں کہڑیاں نیں؟

ج۔کپاہ،سن،سنکڑا تے پٹ سن۔

س26۔پنجاب دیاں فصلاں نوں کِنے موسماں وچ ونڈیا جاندا اے؟

ج۔پنجاب دیاں فصلاں نوں دو موسماں وچ ونڈیا جاندا اے اک ربیع(ہاڑی)تے دوجیاں خریف(ساؤنی) دیاں فصلاں نیں۔

س27۔کماد دی کاشت کویں ہوندی اے؟

ج۔کماد دے سمّے دو دو تِن تِن فُٹ دے فاصلے تے لائے جاندے نیں تے خاص طور تے پھگن دے مہینے وچ ایس دی فصل دی کاشت دا موسم پسند کیتا جاندا اے۔

س28۔کماد نال کیہ کیہ حاصل کیتا جاندا اے؟

ج۔کماد نال رَوہ،فیر رَوہ توں گُڑ تے شکّر کھنڈ بن جاندے نیں۔

س29۔سوانیاں زراعت وچ کویں حصہ لیندیاں نیں؟

ج۔سوانیاں واہی بیجی وچ مرداں دے برابر دا کم کردیاں نیں۔پٹھے وڈھنے،کُترنے تے فیر اپنے مرداں نوں دُپہر ویلے بھتّا(دُپہر دا کھانا) سوانیاں ای پہنچاندیاں نیں۔

س30۔زراعت لئی افرادی قوت دی کیہ اہمیت اے؟

ج۔واہی بیجی لئی جِنے جی ہوون تھوڑے نیں۔ایہدے وچ افرادی قوّت سبھ توں اہم اے گھر دے ہر جی نوں حصہ لینا پیندا اے سگوں کئی تھاواں تے سوانیاں وی مرداں دے برابر کم کردیاں نیں۔