جِنی کنک خریدی اے اوہ پچھلے دس ورھیاں وچ ریکارڈ اے،کمزور طبقے لئی اَسانیاں پیدا کرنیاں نیں: سردار عثمان بزدار……٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار دی صدارت ہیٹھ صوبائی کابینا دا 31 واں اجلاس ہویا‘ جہدے وچ سمبلی (نارتھ) ریزرو فاریسٹ نُوں سالٹ رینج نیشنل پارک بنان دا فیصلا کیتا گیا‘ پنجاب کابینا نے 13700 ایکڑ زمین اُتے سالٹ رینج نیشنل پارک دے قیام لئی نوٹیفکیشن دے اجرا دی منظوری دے دِتی۔ نیشنل پارک وچ رُکھ کٹن تے شکار اُتے پابندی ہووے گی تے نیشنل پارک دی زمین کسے دوجے مقصد لئی استعمال نہیں ہو سکے گی۔ وزیر اعلا عثمان بزدار نے نیشنل پارک دی مینجمنٹ لئی کمیٹی بنان دی ہدایت کردیاں ہویاں کہیا کہ کمیٹی نیشنل پارک دے امور دی نگرای کرے گی۔ صوبائی کابینا نے پنجاب وچ صوبائی محتسب دے عہدے لئی میجر (ر) اعظم سلیمان خان دی تقرری دی منظوری دِتی۔ اجلاس وچ فلر ملکاں نُوں کنک ریلیز کرن لئی عبوری پالیسی 2020-21 لئی خصوصی کمیٹی بنان دا فیصلا کیتا گیا۔ سینئر وزیر عبدالعلیم خان دی اگوائی وچ خصوصی کمیٹی کنک ریلیز کرن دی پالیسی بارے حتمی سفارشاں پیس کر گی۔ کابینا اجلاس وچ دی کوآپریٹو سوسائٹیز ایکٹ 1925 تے دی پنجاب ان ڈیزار ایبل (Undesirable) کوآپریٹو سوسائٹیز (Dissolution) ایکٹ 1993وچ ترامیم دی منظوری دِتی گئی۔ پنجاب کابینا دے اجلاس وچ چالو سیزن وچ ریکارڈ کنک خریدن اُتے وزیر اعلا عثمان بزدار عبدالعلیم خان تے محکما خوراک دی کمکاری دی تعریف کیتی۔ وزیر اعلا نے اجلاس نال خطاب کردیاں ہویاں کہیا کہ پنجاب سرکار نے 10 سال بعد پہلی وار ریکارڈ کنک خریدی ا‘ پنجاب سرکار کول کنک دے وادھو ذخایر موجود نیں‘ کنک ریلیز پالیسی نُوں حتمی شکل دیندیاں ہویاں عام بندے نُوں ریلیف دین اُتے پوری توجا دِتی جاوے۔ اوہناں نے کہیا کہ ساڈی حکومت کمزور طبقے لئی آسانیاں پیدا کر رہی اے تے اگے وی کردی رہوے گی‘ فلور ملاں نُوں کنک دے اجرا دے حوالے توں پالیسی بنان ویلے کمزور طبقے دا خیال رکھیا جاوے گا۔