حکومت کوئی کم نہیں کر رہی، کوئی معاشی پلان نہیں ٭  صحت تے تعلیم دے شعبے تھلے چلے گئے نیں،بے روزگاری حکومتی اداریاں دے کارن اے:چیف جسٹس آف پاکستان……٭رویل نیوز٭

اسلام آباد (نمایندا رویل) سپریم کورٹ وچ کرونا وایرس از خُد نوٹس کیس دی سنوائی دوران چیف جسٹس آف پاکستان جسٹس گلزار احمد نے ریمارکس دِتے کہ حکومت کوئی کم نہیں کر رہی صرف بیان بازی کر رہی اے‘ خالی بیان بازی نال لوکائی دا ڈِھڈ نہیں بھرے گا‘ ملک دی معیشت بلکل بَہ چُکی اے‘ حکومت دے کول کوئی معاشی پلان نہیں‘ صحت تے تعلیم دا شعبا بہت تھلے چلا گیا‘ ان گنت گریجویٹس بیروزگار نیں جہناں لئی حکومت کول کوئی پلان نہیں‘ 1 لکھ لیبر واپس آ رہیا ے جہنوں 14 دن لئی اکلاپے وچ رکھن دے علاوا حکومت دے کول کوئی پلان نہیں‘ حکومت ایہناں نُوں کتھے کھپائے گی‘ حکومت کول کوئی معاشی منصوبا اے تے ساہمنے لیائے‘ لوکاں دے کول کھان لئی کجھ نہیں‘ تنخاہاں دین نُوں پیسے نہیں‘ 4 ارب دیاں لگژری گڈیاں کویں منگوا رہے نیں‘ ایہ گڈیاں صوبے دے حکمراناں لئی منگوائیاں گئیاں نیں‘ اِک گڈی دی قیمت 1 کروڑ 16 لکھ رُپئے اے‘ ایس طرحاں دیاں گڈیاں منگوان دی اجازت نہیں دواں گے‘ سندھ سرکار 4 ارب دی رقم سپریم کورٹ دے کول جمع کروائے‘ اسیں ویکھدے آں ایہ چار ارب رُپئے کویں سرکاری ملازماں تے لیڈراں دیاں عیاشیاں اُتے خرچ ہوندا اے‘ ٹڈی دل دے سپر ے لئی جہازاں دے پائلٹ باہروں کیوں منگوا رہے آں؟ ایس ویلے تربیت دین دا مطلبا انج ای اے کہ بھُکھ لگن اُتے کنک بیجن جایا جاوے‘ اسیں 44 سال توں عالمی تنظیم دے رکن آں تہانوں پہلے توں تیار رہنا چاہیدا سی‘ حکومت دی رپورٹ اے کہ سینٹری ورکرز نُوں دین لئی تنخاہ دے پیسے نہیں تے تُسیں چار ارب گڈیاں لئی مختل کر دِتا‘ ایس آئین دا فایدا اج تک عام بندے نُوں نہیں پہنچیا‘اسیں چاہندے آں ہر شے وچ شفافیت ہووے لگدا اے سول ایوی ایشن والے پیسے لے کے جہاز چلان دا لائسنس دیندے نیں‘ جعلی لائسنس اُتے جہاز اُڈانا انج ای اے جویں کوئی ٹُردا پھردا میزایل ہووے‘ سانوں حکومت دی رپورٹ اُتے حیرانگی ہوئی‘ رپورٹ وچ کہیا گیا جہاز وچ کوئی نقص نہیں سی‘ حیرت دیگ ل اے 15 سال پرانا جہاز اُڈایا گیا‘ رپورٹ وچ سارا ملبا سول ایوی ایشن اُتے پا دِتا گیا‘ سول ایوی ایشن والے اوہی نیں جہڑے پائلٹاں نُوں لائسنس دیندے نیں‘ ایہ حیران کن اے کہ جعلی لائسنس دی بنیاد اُتے جہازاں دیاں کمرشل اُڈاناں اُڈان دی اجازت دِتی گئی‘ سول ایوی ایشن پیسے لے کے پائلٹاں نُوں لائسنس جاری کردی اے‘ تے قصور سول ایوی ایشن دا ہویا پائلٹاں دا کیہ قصور اے؟ اٹارنی جنرل صاحب دَسو سول ایوی ایشن دے خلاف کیہ کارروائی ہونی چاہیدی اے‘ عدالت عظمیٰ نے سول ایوی ایشن اتھارٹی دے ڈائریکٹر جنرل سنے پی آئی اے‘ ائر بلیو تے سرین ائر لائن دے آگوواں نُوں ذاتی حیثیت وچ سَددیاں ہویاں سول ایوی ایشن اتھارٹی دے ڈائریکٹر جنرل نُوں ذاتی حیثیت وچ پیش ہو کے جعلی ڈگری والے پائلٹاں بارے وضاحت منگ لئی۔کیس دی سنوائی چیف جسٹس دی اگوائی وچ 5 رکنی لارجر بینچ نے کیتی۔سنوائی دوران چیف جسٹس نے ریمارکس دِتے کہ این ڈی ایم اے ارباں رُپئے ایدھر اودھر خرچ کر رہیا اے‘ نہیں پتا این ڈی ایم اے کویں کم کر رہیا اے‘ اٹارنی جنرل نے عدالت نُوں دَسیا کہ این ڈی ایم اے نُوں قانونی تحفظ حاصل اے‘ این ڈی ایم اے دا آڈٹ آڈیٹر جنرل آف پاکستان کردا اے‘ این ڈی ایم اے دوائیاں منگوان وچ سہولت کار دا کردار ادا کر رہیا اے‘ ڈیوٹی وچ فایدا کسے کمپنی نُوں نہیں دِتا گیا۔ جسٹس اعجاز الاحسن نے پُچھیا کہ مشینری منگوان وچ این ڈی ایم اے نے نجی کمپنی نُوں سہولت فراہم کیتی‘ مشینری اُتے کسٹم یاں ٹیکس نجی کمپنی نے آپ جمع کروایا۔ ممبران این ڈی ایم اے ولوں عدالت نُوں دَسیا گیا کہ 28 کمپنیاں نے مشینری باہروں منگوان لئی این ڈی ایم اے نال رابطا کیتا‘ ایہ نجی کمپنیاں این 95 ماسک نہیں بنا رہیاں سن۔ چیف جسٹس نے ریمارکس دِتے کہ ایس طرحاں تے نجی کمپنی این 95 ماسک بنان والی کلی کمپنی بن گئی اے۔ نجی کمپنی دا مالک دو دن وچ ارب پتی بن گیا ہووے گا‘ نہیں پتا ایس کمپنی دے پارٹنرز کون نیں‘ ایہو جہی مہربانی سرکار نے کسے کمپصنی دے نال نہیں کیتی‘ ایہدے مالک دا گھر بیٹھے کم ہو گیا‘ نہیں پتاکہ باقی لوکاں تے کمپنیاں دے نال کیہ ہویا‘ کرونا وایرس نے لوکاں نُوں راتوں رات ارب پتی بنا دِتی۔ ایہدے وچ کافی سارے لوک شامل نیں‘این ڈی ایم اے نے صرف اِک نجی کمپنی نُوں سہولت فراہم کیتی‘ کیہ ایہدے لئی اشتہار دِتا‘ این ڈی ایم دے کم وچ شفافیت نظر نہیں آ رہی‘ ایہو جہی سہولت فراہم کرو تے ملک دی تقدیر بدل جاوے‘ بیروزگاری ایسے وجھا توں اے کہ حکومتی اداریاں توں سہولت نہیں ملدی۔ ایس توں بعد عدالت نے کیس دی سنوائی 2 ہفتیاں لئی ملتوی کر دِتی۔