کرونا وایرس تے قابو پاون لئی احتیاطی تدبیراں نال چنگے نتیجے آ رہے نیں:وفاقی وزیر  اسد عمر……٭رویل نیوز٭

اسلام آباد (نمایندا رویل) وفاقی وزیر برائے منصوبا بندی‘ ترقی‘ اصلاحات اسد عمر نے کہیا اے کہ حکومت دے مؤثر اقدامات تے لوکائی ولوں احتیاطی تدبیراں اُتے عملدرآمد دے چنگے نتیجے آ رہے نیں‘ حالے خطرا ٹلیا نہیں جے حفاظتی اقدامات تے احتیاطی تدبیراں اُتے عمل نہ کیتا گیا تے صورتحال خراب ہو سکدی اے‘ 30 جون تک کرونا دے کیسز 2 لکھ 25 ہزار دے نیڑے رہن دا امکان اے۔ ایہناں خیالاں دا اظہار اوہناں نے جمعے نُوں این سی او سی وچ وفاقی وزیر اطلاعات سینیٹر شبلی فراز دے نال پریس کانفرنس کردیاں ہویا ں کیتا۔ وفاقی وزیر نے کہیا کہ ماہرین دی رائے مطابق جون تک کرونا کیسز دی گنتی 3 لکھ تک پہنچن دا امکان ظاہر کیتا گیا سی پر کرونا کیسز دی موجودا صورتحال دے تناظر وچ 30 جون نُوں کرونا کیسز دی گنتی 2 لکھ 25 ہزار دے نیڑے تیڑے رہن دا امکان اے۔ اوہناں نے کہیا کہ ایہناں آنکڑیاں دے تجزیے توں ظاہر ہوندا اے کہ جے اسیں صحیح کم کراں گے تے صورتحال قابو و چ رہوے گی۔ وفاقی وزیر نے کہیا کہ قو م نے احساس ذمے داری دا مظاہرا کیتاجد کہ حکومت نے ایس او پیز دی خلاف ورزی اُتے انتظامی کارروائیاں کیتیاں جہدے نال صورتحال وچ کجھ بہتری آئی اے۔ اسد عمر نے کہیا کہ حالے خطرا ٹلیا نہیں‘ جے اسیں احتیاط کراں گے تے صورتحال وچ بہتری آئے گی پر احتیاط نہیں کراں گے تے خطرا ودھے گا۔ اوہناں نے کہیا کہ اِک ہفتے وچ کرونا وایرس دی صورتحال نُوں ساہمنے رکھ کے مستقبل دی حکمت عملی توں اگاہ کراں گے۔ اوہناں نے کہیا کہ سانوں ڈاکٹراں دیاں ہدایتاں اُتے عمل کرنا چاہیدا اے‘ وار وار ہتھ دھونے چاہیدے نیں۔ جے ایہناں ہدایتاں اُتے عمل کراں گے تے صحت دا نظام مفلوج نہیں ہووے گا۔اوہناں نے کہیا کہ وفاق نے پورے ملک وچ جون دے آخر تک آکسیجن والے 1 ہزار بیڈز فراہم کرن تے جولائی دے آخر تک 2000 توں ودھ آکسیجن والے بیڈز فراہم کرن دا کہیا سی جہدے اُتے تیزی نال عملدرآمد جاری اے۔ اوہناں نے کہیا کہ ڈاکٹرز‘ نرسنگ تے پیرا میڈیکس اؤکھے ویلے وچ قومی خدمت سرانجام دے رہے نیں۔ کرونا روگیاں دے علاج لئی ہر ممکن کوشش کر رہے نیں‘ ساڈی وی ذمے داری اے کہ اسیں حفاظتی تدبیراں اُتے عمل کریے‘ جے ذمے داری دا مظاہرا کیتا گیا تے صحت دا نظام مفلوج نہیں ہووے گا‘ کاروبا ر زندگی چلے گا‘ لوکاں دی صحت دی حفاظت وی کر سکاں گے تے دیہاڑی دار تے مزدور طبقا وی متاثر نہیں ہووے گا‘ کرونا وباء خلاف لڑن اُتے قوم تے ہیلتھ ورکرز دا شکریا ادا کردا آں تے ہیلتھ ورکز نُوں سلام پیش کردا آں۔