kraamaat@gmail.com
+ +92 333-430-6384


چیئرمین پی پی پی دا شہباز شریف‘ فضل الرحمان‘ آفتاب شیر پاؤ‘ محسن داوڑ تے ہور سیاسی آگوواں نُوں ٹیلیفون  ……٭رویل نیوز٭


نمائندا رویل June 27, 2020


اسلام آباد (نمایندا رویل) پاکستان پیپلز پارٹی دے چیئرمین بلاول بھٹو زرداری نے مختلف سیاسی آگوواں نال ٹیلیفونک رابطے کیتے تے مختلف اہم امور اُتے وچار وٹاندرا کیتا۔ چیئرمین پی پی نے شہباز شریف‘ فضل الرحمان‘ آفتاب شیر پاؤ‘ محسن داوڑ سنے ہور اہم آگوواں نُوں ٹیلیفون کیتے۔ بلاول بھٹو زرداری نے پاکستان مسلم لیگ (ن) دے صدر تے قائد حزب اختلاف شہباز شریف نُوں ٹیلیفون کیتا‘ جہدے وچ بجٹ نُوں مکمل طور اُتے رَد کرن تے اگلے ہفتے آل پارٹیز کانفرنس بلان اُتے اتفاق کیتا گیا۔بلاول نے شہباز شریف توں صحت بارے پُچھیا تے چھیتی صحت یابی دی دُعا وی کیتی۔ دوہاں آگوواں نے ملک دی مجموعی صورتحال اُتے وی وچار وٹاندرا کیتا‘ تحریک انصاف ولوں پیش کیتے گئے قومی بجٹ نُوں مکمل طور اُتے رَد کرن اُتے اتفاق کیتا گیا جد کہ اگلے ہفتے آل پارٹیز کانفرنس بلان اُتے وی مشاورت کیتی۔ ایس توں وکھ پی پی چیئرمین نے مولانا فضل الرحمان نُوں وی ٹیلیفون کیتا‘ دوہاں آگوواں وچ حکومتی بجٹ مکمل طور اُتے رَد کرن اُتے اتفاق ہویا جد کہ اگلے ہفتے اے پی سی بلان اُتے وی مشاورت ہوئی۔ کرونا بارے بلاول دا کہنا سی کہ ملک وچ حکومتی نا اہلی دی وجھا توں کرونا وایرس کھلریا‘ پاکستان دی لوکائی غریب دشمن بجٹ نُوں رَد کر چکی اے‘ ملکی آئین اُتے حملیاں نُوں کسے صورت برداشت نہیں کراں گے۔ قومی وطن پارٹی دے آگو آفتاب شیر پاؤ نال ٹیلیفونک رابطے دے بعد بلاول دا کہنا سی کہ ملک وچ کرونا وایرس دی صورتحال تشویشناک اے۔ اوہناں دا کہنا سی کہ حکومت ملکی معیشت نُوں تباہی نال دوچار کر چکی اے‘ لوکائی دشمن بجٹ نُوں کسے صورت تسلیم نہیں کیتا جا سکدا‘ عمران خان مسلسل کنفیوژ ڈ رہے تے کرونا وایرس ملک دے چپے چپے وچ کھلر گیا۔پی پی چیئرمین دا کہنا سی کہ عمران خان 18 ویں آئینی ترمیم دا ناں لے کے ملکی آئین نُوں نشانا بنا رہے نیں‘ وزیراعظم آئین اُتے حملے کرن دی بجائے کرونا وایرس توں لوکائی نُوں بچان دا کم کرن۔ ایم این اے محسن داوڑ نال گلبات کردیاں اوہناں دا کہنا سی کہ حکومت معاشی میدان وچ پہلے دن توں ناکام رہی‘ حکومت معاشی میدان وچ اپنی ناکامی نُوں کرونا وایرس پچھے نہیں لُکا سکدی۔ اسیں ایہو جہے بجٹ نُوں نہیں مند ے جہدے وچ لوکائی لئی ریلیف نہ ہووے۔